ԵՐԵՎԱՆ 6 փետրվարի – Sputnik, Լաուրա Սարգսյան. Ռուսաստանցի և վրացի փորձագետները հորդորում են Թբիլիսիին բացահայտել 2017 թվականին շվեյցարական SGS ընկերության հետ կնքած պայմանագրի մանրամասները։ Նրանց կարծիքով` դա թույլ կտա 2011 թվականի ռուս–վրացական համաձայնագրի իրականացման հետ կապված բոլոր հարցերի պատասխանները ստանալ։
«Համաձայնագրում ամրագրված են այն միջանցքների կոորտինատները, որոնցով պետք է Ռուսաստանի ու Վրաստանի միջով անցնեն բեռները։ Պայմանագրով մաքսային ստուգման են ենթարկվում ոչ միայն տարանցիկ ապրանքները», – Sputnik Արմենիայի թղթակցի հետ զրույցում ասաց ՄԳԻՄՕ-ի Կովկասի խնդիրների և տարածաշրջանային անվտանգության կենտրոնի ավագ գիտաշխատող Նիկոլայ Սիլաևը։
Համաձայնագիրը նախատեսում է, որ Վրաստանի տարածքով Աբխազիա և Հարավային Օսեթիա մեկնող գնացքների ապրանքները պետք է մաքսային ստուգում անցնեն։ Հենց դա էլ կիրականացնի շվեյցարական ընկությունը, որը պետք է համեմատի այդ միջանցքներով անցնող ապրանքների տվյալները պայմանագրի մասնակից երկրների վիճակագրությունների հետ։
«Եթե Վրաստանում Աբխազիայի և Հարավային Օսեթիայի ճանապարհին մաքսային կետեր չստեղծվեն, ապա Վրաստանը համեմատություն անելու համար բազա չի ունենա», – ասաց Սիլաևը։
Նա համոզված է, որ վրացական իշխանությունները փորձում են շրջանցել այդ կետը` միաժամանակ փորձելով ապացուցել, որ 2011 թվականի համաձայնագիրը կնքվել է Աբխազիայի ու Հարավային Օսեթիայի հետ Ռուսաստանի ապրանքաշրջանառությունը վերահսկելու նպատակով։ Ըստ Սիլաևի` իրականում դա այդպես չէ։
Նա կոչ արեց Վրաստանի իշխանություններին հրապարակել անցած տարի շվեյցարական ընկերության հետ կնքած պայմանագրի բովանդակությունը։
Վրաստանի նախագահի աշխատակազմի նախկին պետ Պետրե Մամրաձեն նույնպես կոչ արեց Թբիլիսիին «գաղտնազերծել» պայմանագրի բովանդակությունը ։
«Վրաստանի ու շվեյցարական ընկերության միջև կնքված պայմանագիրը պետք է բաց ու հասանելի լինի, քանի որ դրանում ոչ մի գաղտնի բան չկա», – համոզված է Մամրաձեն։
Նրա խոսքով`եթե նա իշխանությունների փոխարեն լիներ, ապա մամուլի ասուլիս կհրավիրեր և կհանրայնացներ շվեյցարացիների հետ համաձայնագրի բոլոր դրույթները։
Մամրաձեն շարունակում է պնդել, որ համաձայնագրի իրականացումը ձգձգվում է այն պատճառով, որ Մոսկվային դեռ չի հաջողվում սանձել Աբխազիայի ու Հարավային Օսեթիայի հավակնությունները։
Նախօրեին վրացական «TV Պիրվելի» գործակալության հետ հարցազրույցում Վրաստանի վարչապետի` ՌԴ–ի հետ հարաբերությունների գծով հատուկ ներկայացուցիչ Զուրաբ Աբաշիձեն կրկին նշել է` Պրահայում Ռուսաստանի արտգործնախարար Գրիգորի Կարասինովի հետ հանդիպման ժամանակ պարզվել է, որ ռուսական ու վրացական կողմերի դիրքորոշումը 2011 թվականի «Մաքսային վարչարարության և ապրանքների առևտրի մոնիթորինգի մեխանիզմների հիմնական սկզբունքների մասին» համաձայնագիրի վերաբերյալ լրջորեն տարեբրվում է։
Նա ընդգծել է, որ առաջիկայում շվեյցարական ընկերության հետ խորհրդատվություն է լինելու և հնարավոր է`մոտ ապագայում SGS ընկերության հետ նմանատիպ գործարք կնքի նաև Ռուսաստանը։