ԵՐԵՎԱՆ, 2 փետրվարի — Sputnik. Ռուսաստանի վարչապես Դմիտրի Մեդվեդևը Եվրասիական միջկառավարական խորհրդի նիստի ժամանակ կատակել է Ալմաթիում եղած երկրաշարժի թեմայով: Այս մասին հայտնում է Sputnik Ղազախստանը:
«Մենք լավ աշխատեցինք նաև սահմանափակ կազմով՝ ջերմ մթնոլորտում, այդ աշխատանքն, ինչպես հայտնի է, ուղեկցվեց թեթև երկրաշարժով։ Երկրաշարժն եղավ այն ժամանակ, երբ դիտարկում էինք Բելառուսի Հանրապետության նախարարների խորհրդի՝ համար 666 որոշմանն առնչվող հետաքրքիր հարցերից մեկը, ինչը մտածելու տեղիք է տալիս։ Այնուամենայնիվ, ամեն ինչ բարեհաջող անցավ, բոլոր որոշումներն ընդունվեցին և ստորագրվեցին», — ասել է Դմիտրի Մեդվեդևը։
Այսօր Ալմաթիում տեղի է ունեցել Եվրասիական միջկառավարական խորհրդի հերթական նիստը, որին մասնակցել են Եվրասիական տնտեսական միության անդամ երկրների նախագահներն ու Եվրասիական տնտեսական հանձնաժողովի նախագահ Տիգրան Սարգսյանը։
Մինչ այդ կայացել էր «Թվային օրակարգը գլոբալիզացիայի դարաշրջանում» համաժողովը, որի ժամանակ էլ եղել էր երկրաշարժը։ Հայաստանի վարչապետ Կարեն Կարապետյանը ԱՊՀ երկրների իր գործընկերների հետ այդ ժամանակ Ալմաթիում էր՝ երկրաշարժի գոտում:
Երկրաշարժի էպիկենտրոնը գտնվել է Ալմաթիից 5 կմ դեպի արևմուտք: Քաղաքում 2-3 բալ ուժգնությամբ ստորերկրյա ցնցումներ են զգացվել։