ԵՐԵՎԱՆ, 31 հունվարի — Sputnik. Վերջին շրջանում Բելառուսում հաճախակի են դարձել հայ-ռուսական երկակի քաղաքացիությամբ անձանց ձերբակալելու դեպքերը, որոնց նկատմամբ Ինտերպոլը միջազգային հետախուզում է հայտարարել Հայաստանում զինվորական ծառայությունից խուսափելու համար։ Այդ մասին Sputnik-Բելառուս մուլտիմեդիոն մամուլի կենտրոնում լրագրողների հետ հանդիպմանն ասել է Բելառուսում ՌԴ դեսպանատան հյուպատոսական բաժնի վարիչ Գավրիիլ Մամոնտովը։
Նրա խոսքով` Ռուսաստանի քաղաքացիներն օրենքի չիմացության պատճառով հաճախ են ընկնում տհաճ իրավիճակների մեջ։ Մասնավորապես, դա վերաբերում է այն ռուսաստանցիներին, որոնց Ինտերպոլը փնտրում է։ Հատուկ կարգ են կազմում ռուս-հայկական քաղաքացիությամբ անձինք, որոնք խուսափում են հայկական բանակում ծառայելուց, ինչը ՀՀ-ում քրեական հանցագործություն է համարվում։
Հյուպատոսի խոսքով` երիտասարդները, որոնք չեն մեկնում Հայաստան զինվորական գրքույկ ստանալու, բանակում ծառայելու կամ օրինական կարգով զինվորական ծառայությունից ազատվելու, մեխանիկորեն հայտնվում են հետախուզության բազայում, իսկ հետո Հայաստանը նրանց նկատմամբ Ինտերպոլի միջոցով միջազգային հետախուզում է հայտարարում։
«Շատերը չգիտեն, որ միջազգային կոնվենցիոն իրավունքի հետ կապված` Ռուսաստանի քաղաքացիները, որոնց նկատմամբ երրորդ երկիրը Ինտերպոլի միջոցով հետախուզում է հայտարարել, այսինքն ոչ Ռուսաստանում և Բելառուսում, և ժամանել են Բելառուսի տարածք, կձերբակալվեն իրավապահ մարմինների կողմից», — ասել է Մամոնտովը։
Նա նշել է, որ հետագայում համապատասխան ընթացակարգերից հետո նրանց կարող են հանձնել երրորդ երկրին` արտասահմանյան պետության դատախազության հարցումով։
«Նույնիսկ այն դեպքում, եթե ռուսական դատախազությունը դադարեցրել է ՌԴ տարածքում ռուսաստանցու նկատմամբ հետապնդումը երրորդ երկրի հարցումով, օտար պետության պահանջներն ուժի մեջ են մնում։ Համապատասխանաբար ռուսաստանցին չի կարող բացառվել Ինտերպոլի ցուցակից և կձերբակալվի Բելառուսում», — ասել է ՌԴ դեսպանատան ներկայացուցիչը։
Մամոնտովը խորհուրդ է տվել Ռուսաստանի քաղաքացիներին, որոնց նկատմամբ այլ երկրների իրավապահ մարմինները կարող են նման պահանջներ ներկայացնել, խուսափել Բելառուս մտնելուց մինչև խնդրի կարգավորումը և Ինտերպոլի ցուցակից դուրս գալը։ Դրանից հետո ավելի լավ է ինչ-որ թուղթ ունենալ, որովհետև այդ տվյալներն այդքան արագ չեն կարող թարմացվել, եզրափակել է Մամոնտովը։