ԵՐԵՎԱՆ, 30 հունվարի — Sputnik. Հայտնի երգչուհի, դերասանուհի և հեռուստահաղորդավարուհի Ռոքսանա Բաբայանն ու Ռուսաստանի ժողովրդական արտիստ, Մոսկվայի ակադեմիական թատրոնի առաջատար դերասան Միխայիլ Դերժավինն ամեն օր միմյանց սեր էին խոստովանում, քանի որ «վաղն» արդեն կարող էր ուշ լինել։ Այս մասին Բաբայանը պատմել է Sobesednik.ru ռուսական պարբերականի հետ հարցազրույցում։
«Մենք միշտ միմյանց սեր էինք խոստովանում, դա կարևոր է անել այսօր, քանի որ ոչ ոք չի խոստացել, որ «վաղը» գալու է։ Ես հաճախ էի ասում նրան. «Սիրում եմ քեզ, դու իմ գանձն ես», – պատմել է Բաբայանը։
Նրա խոսքով` երբ կինն ամուսնանում է, պետք է հիշի, որ դա պարզապես աստղերի տակ ծլվլոց չէ։ Այն երկար ճանապարհ է, որի ընթացքում կորուստներ ու հիասթափություններ են լինում։ Բաբայանն ու Դերժավինն արդեն բավականին հասուն տարիքում են ամուսնացել։ Դերժավինն արդեն երկու անգամ ամուսնացած եղել էր, Բաբայանը մեկ ամուսնալուծություն էր ունեցել։
«Ամուսնանալով Դերժավինի հետ` հասկանում էի, որ նրա ամբողջ ընտանիքի հետ եմ ամուսնանում։ Ընտանիքը, ցեղը նրա համար շատ կարևոր էին», – ասել է Բաբայանը։
Գործընկեր ու մտերիմ ընկեր Միխայիլ Շիրվինդտնը հաճախ կատակում էր. «Նրանց բնակարանն այնքան փոքր է, որ նույնիսկ կատուն ապրելու տեղ չունի»։
Սակայն Դերժավինը սկզբունքորեն չէր տեղափոխվում, նույնիսկ երբ նրան հսկայական երեքսենյականոց բնակարան առաջարկեցին։ Տունը որպես մանկական հիշողություն թանկ էր նրա համար. այստեղ էին ապրել նրա մայրը, քույրերը։ Բաբայանը աջակցեց ամուսնու որոշմանը։
«Որովհետև կարողանում էինք միմյանց ընդառաջել ու ներդաշնակություն ստեղծեցինք, իհարկե, որոշակի սխալների միջով անցնելուց հետո։ Մեր ընտանիքը երբեք կանգնած երբեք չի եղել ամուսնալուծության շեմին», –նշել է Բաբայանը։
Ամուսնու նա հիշում է, որպես հումորի զգացումով, չափազանց նրբանկատ մարդ։ Նա երբեք չի տեսել, որ ամուսինը մեկին վիրավորի։
Դերժավինը երկար ժամանակ տառապել է սրտի իշեմիկ հիվանդությունից, թրոմբ էր առաջացել, նրան հոսպիտալացրին` դրանք հեռացնելու համար։ Երկու վիրահատություն տարավ։
«Հասկանում էի, որ սրտի հետ խնդիրներ ունի, նա հիպերտոնիկ էր։ Դերասանների մոտ այդպես է լինում։ Նույնիսկ, եթե ջերմությունը 40 է կամ ճնշումը նորմալ չէ, միևնույն է ներկայացումները ոչ ոք չի հետաձգում, բոլորը հյուրախաղերի են մեկնում։
Ռոքսանան հիանալի խոհարար էր, նրանց տան մթնոլորտը միշտ սիրով էր լեցուն։ Նրանք 37 տարի ներդաշնակ ապրել են միասին։ Կենցաղում միշտ փոխզիջումների էին գնում, ոչ ոք չէր փորձում ղեկավարել։
Ռուսաստանի ժողովրդական արտիստ, Մոսկվայի ակադեմիական թատրոնի առաջատար դերասան Միխայիլ Դերժավինը մահացել է 2018թ.–ի հունվարի 10–ին։
Նա ծնվել է 1936 թվականի հունիսի 15-ին Մոսկվայում, Վախթանգովի անվան թատրոնի առաջատար դերասաններից մեկի` Միխայիլ Ստեփանովիչ Դերժավինի ընտանիքում։ Մի քանի շքանշան է ստացել, այդ թվում` «Հայրենիքի հանդեպ վաստակի համար» երրորդ ու չորրորդ աստիճանի շքանշաններ։