ԵՐԵՎԱՆ, 29 հունվարի — Sputnik. Նախօրեին ձնահոսքի պատճառով կոտրվածքներ ստացած հայտնի լեռնագնաց Էդգար Նավասարդյանը վերակենդանացման բաժանմունքում է գտնվում։ Այս մասին հայտնել է Ալպինիզմի և լեռնային տուրիզմի հայկական ֆեդերացիայի նախագահ Սուրեն Դանիելյանը։
Նրա խոսքով` ձնահոսքի պատճառով Նավասարդյանը ոտքի բազմաթիվ կոտրվածքներ ունի ու ցրտահարություն է ստացել։
«Նախապես ներողություն խնդրելով դեպքի վայրից երեկվա մեր հարկադրված լռության և ձեր մեկնաբանություններին չպատասխանելու համար՝ ցավով տեղեկացնում ենք, երեկ՝ հունվարի 28-ին, Էդգար Նավասարդյանի արշավական խմբի մի մասը Արա լեռան վրա տեղի ունեցած ձյան անկման հետևանքով հայտնվել է ծանր իրավիճակում՝ ձյան հետ սահելով լանջից ցած», — ֆեյսբուքյան իր էջում գրել է Դանիելյանը։
Միջադեպից անմիջապես հետո արշավախմբի անդամները զանգահարել են Ֆեդերացիա ու ԱԻՆ։ Դանիելյանի խոսքով` մինչ փրկարարների դեպքի վայր հասնելը արշավախմբի անդամներն արել են հնարավոր ամեն բան` ձնահոսքի պատճառով տուժածներին օգնություն ցուցաբերելու համար։
Ոչ մի րոպե չկորցնելով՝ լեռնագնացների խումբը օգնության է մեկնել ու արդեն դեպքից 40 րոպե անց դեպքի վայրում է եղել։
«Մեր խմբի հետ միաժամանակ սկսեց բարձրանալ նաև Երևանի հատուկ նշանակության փրկարարական խումբը։ Ցավով արձանագրեցինք, որ խմբի արշավական մի աղջիկ՝ Նաիրուհի Սիմոնյանը, ըստ մեր կարծիքի, անկման հետևանքով ստացել էր կյանքի համար անհամատեղելի վնասվածքներ և մահացել, ինչի համար խոր ցավ ենք ապրում և ընտանիքի անդամներին ու հարազատներին հայտնում ենք մեր ցավակցություններն ու կարեկցանքը», — ասվում է հաղոդրագրության մեջ։
Դանիելյանը հավելել է, որ երկու ժամ տևած համատեղ աշխատանքներից հետո հաջողվել է Էդգար Նավասարդյանին Արա լեռից իջեցնել։
«Իհարկե, այժմ բոլորիս հետաքրքրում են պատճառներն ու անվտանգության ապահովման հարցը, ինչի վերաբերյալ կիսում եմ ձեր մտահոգությունը», — նշել է նա։
Նա, սակայն, ասել է, որ կարծիքներ կարող են հայտնել թիմի անդամների և Էդգար Նավասարդյանի հայտնած տեղեկությունների, եղանակային պայմանները հաշվի առնելու և տեղանքի վտանգավորությունը գնահատելուց հետո միայն։