ԵՐԵՎԱՆ, 25 հունվարի — Sputnik. Հայաստանի քաղաքացիներին բանակում ծառայելու տարկետման իրավունք կտան արտասահմանի դպրոցներում և մասնագիտական ուսումնարաններում սովորելու դեպքում։ «Զինվորական ծառայության և զինծառայողի կարգավիճակի մասին» օրենքում համապատասխան փոփոխություններ կատարելու մասին նախագիծը հավանություն ստացավ հունվարի 25-ին Հայաստանի կառավարության նիստում։
«Արտասահմանի բուհերում սովորող ՀՀ քաղաքացիները տարկետման իրավունք արդեն ունեին։ Հիմա այն տրվում է նաև արտասահմանյան դպրոցներում և միջին մասնագիտական ուսումնական հաստատություններում սովորողներին»,- ասաց Հայաստանի կրթության և գիտության նախարար Լևոն Մկրտչյանը։
Նրա խոսքով` արդյունքում կկարգավորվի արտասահմանում Հայաստանի քաղաքացիների համար ծառայությունից տարկետումը։
2017թ-ին Հայաստանի պաշտպանության նախարարությունը ներկայացրել է պայմանագրային ծառայության երկու ծրագրեր` «Պատիվ ունեմ» և «Ես եմ»։
Բուհերի ուսանողները, որոնք որոշել են օգտվել «Պատիվ ունեմ» ծրագրից, տարկետման իրավունք կստանան բակալավրիատում ուսումը շարունակելու համար, միաժամանակ նրանք ռազմական դասընթացներ կանցնեն։
Ուսումն ավարտելուց հետո նրանց կտրվի լեյտենանտի կոչում, և նրանք 3 տարով կմեկնեն զինվորական ծառայության, որի ընթացքում աշխատավարձ կստանան։
Ժամկետային ծառայությունն ավարտելուց հետո ուսանողները ֆինանսական օգնություն կստանան` մագիստրատուրայում ուսումը շարունակելու համար։
«Ես եմ» ծրագիրը նախատեսված է այն նորակոչիկների համար, որոնք ցանկանում են ծառայել արտասահմանում։ Այդ դեպքում նրանք ծառայելու են պայմանագրային-ժամկետային համակարգով։
Ծառայության ժամկետը երեք տարի է։ Միաժամանակ զինծառայողը ծառայության երեք տարվա ընթացքում յոթ ամիսը կարող է անցկացնել տանը։