ԵՐԵՎԱՆ, 24 հունվարի — Sputnik. Կրիպտոարժույթի մեծ առավելությունների մասին տեղեկատվությունը պետք է հասցնել հասարակությանը։ Այս մասին այսօր լրագրողներին ասաց Bitcoin Center NYC–ի տնօրեն և հիմնադիր Նիք Սպանոսը։
Ապագայում ընկերությունը պատրաստվում է ստեղծել կրիպտոարժույթների բորսա։
Հայաստանում Սպանոսը նախատեսում է հանդիպել ֆինանսիստների և ծրագրային ապահովում մշակողների հետ, որոնք հետաքրքրված են համագործակցությամբ։
«Նյու Յորքում մենք արդեն բանկոմատներ ենք առաջարկում բիթքոինի համար։ Մենք ապացուցում ենք, որ կրիպտոարժույթներով գործարքները կարող են համապատասխանել ճանաչիր քո հաճախորդին պահանջին, որն ընկած է ԱՄՆ–ի բանկային համակարգի հիմքում։ Մեր բանկոմատի միջոցով բիթքոին գնելու համար պետք է ունենալ վարորդական իրավունքի վկայական (ԱՄՆ–ում այն օգտագործում են նաև որպես ID–քարտ, խմբ.)։ Ընդ որում` մենք միացած ենք իրավապահ մարմիններին տվյալների բազային։ Եվ եթե դրանցից մեկում նա հայտնվի որպես հանցագործ կամ ահաբեկիչ, ապա մենք մերժում ենք գործարքը», – ասաց Սպանոսը։
Նշենք, որ աշխարհում կրիպտոարժույթները չեն կարգավորվում (բացառություն է Չինաստանը, որտեղ դրանք արգելված են)։ ԱՄՆ–ի իշխանությունները «ուշադիր զննում են», ինչպես ավելի վաղ հայտարարել է ԱՄՆ–ի ֆինանսների նախարար Սթիվեն Մնուչինը։ Եվրասիական միությունում դրանց վերաբերյալ իրավական ակտեր չկան։ Coinatmradar կայքի տվյալներով` ԵԱՏՄ–ում արդեն մի քանի բիթքոին–բանկոմատներ կան` Կրասնոդարում, Նովոսիբիրսկում, Կրասնոյարսկում, Ալմաթիում և Աստանայում։
Բիթքոինի ընդդիմադիրները պնդում են, որ այն ապահովված չէ ոչ մի ակտիվով։ Գործնականում այն մի շարք առավելությունն ունի։ Դրա էմիսիան խիստ սահմանափակ է. դրա բազային ալգորիթմում նշված է բիթքոինի վերջնական թիվը` ոչ ավել, քան 21 միլիոնը։ Առայժմ ապացույցներ չկան, որ այդ ալգորիթմը կարելի է փոխել։ Սովորական արժույթի չարաշահումներից ոչ ոք ապահովագրված չէ։
Մյուս կողմից, բիթքոինի հիմնադիրները չեն բացահայտում իրենց և ֆինանսական հաշվետվություն չեն հրապարակում։ Չի բացահայտվում նաև այն, թե ով է վերահսկում բիթքոինի մայներներին (անձանց խումբ, որոնք ստուգում են գործարքները)։ Եթե մայներների ավելի քան 51 տոկոսը միավորվի, նրանք կկարողանան չեղարկել ցանկացած գործարք` ըստ իրենց հայեցողության (այսպես կոչված` 51% attack)։ Այդ վտանգների մասին Սպանոսը նախընտրեց չխոսել։
Առաջիկա օրերին նա և իր գործընկերները մի շարք հանդիպումներ կանցկացնեն պոտենցիալ գործընկերների հետ։
Նշենք, որ աշխարհում շրջանառվում են հարյուրավոր կրիպտոարժույթներ։ Դրանցից խոշորագույնը Bitcoin–ը և Ethereum–ն են։ Coinmarketcap կայքի տվյալներով` կրիպտոարժույթների ընդհանուր կապիտալիզացիան կազմում է 551 միլիարդ դոլար (ճիշտ է, այդ արժեքի աուդիտ ոչ ոք չի անցկացրել)։