ԵՐԵՎԱՆ, 23 հունվարի — Sputnik. Պետք չէ մտածել, որ Հայաստանում աշխատավարձերն ու կենսաթոշակներն ավելի ցածր են, քան հարևանների մոտ։ Այս մասին ԱԺ-ում գնաճի վերաբերյալ լսումների ժամանակ հայտարարեց Կենտրոնական բանկի նախագահ Արթուր Ջավադյանը։
«Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով խորհրդարանական լսումները կազմակերպել է ԱԺ տնտեսական հարցերի հանձնաժողովը։
Վերջին երկու տարում Հայաստանում գնաճը կազմել է 1,5 տոկոս, Վրաստանում` 8,6 տոկոս, Ադրբեջանում` 24,6 տոկոս, Ռուսաստանում` 8 տոկոս, Ուկրաինայում` 27,8 տոկոս։
2018թ-ին ԿԲ-ն կանխատեսում է, որ հարկերի և հարկային ստուգումների պատճառով երկրում գները կարող են բարձրանալ առավելագույնը 1,3 տոկոսով։
«Համեմատեք իմ նշած ցուցանիշների հետ», — ասաց Ջավադյանը։
Ինչ վերաբերում է բարեկեցության ցուցանիշներին` միջին աշխատավարձերին և կենսաթոշակներին, ինչպես նաև մեկ անձին բաժին ընկնող ՀՆԱ-ին, ապա շատերը կարծում են, որ Հայաստանում այն ավելի ցածր է, քան հարևանների մոտ։
«Իրականում դա ուղղակի միֆ է», — ասաց Ջավադյանը։
Նշենք, որ Հայաստանում միջին աշխատավարձը կազմում է մոտ 188 հազար դրամ (309 դոլար), Ադրբեջանում` 520 մանաթ (305 դոլար)։