ԵՐԵՎԱՆ, 22 հունվարի — Sputnik. Հայկական սփյուռքում խառն ամուսնությունների թիվն աճում է ՀՀ ԱԺ–ում լսումների ժամանակ հայտարարեց սփյուռքի նախարար Հրանուշ Հակոբյանը։
Արդյունքում թուլանում է հայոց լեզվի իմացությունն ու ազգային ինքնագիտակցությունը։ Արտասահմանում համայնքի կյանքին ակտիվ մասնակցություն է ունենում լավագույն դեպքում յուրաքանչյուր 4-5–րդ հայը, ավելացրեց նա։
Իհարկե, ոչ ոք չի կարող մարդուն ասել, թե ում հետ նա պետք է ընտանիք կազմի, սակայն Սփյուռքի նախարարությունը պետք է ամեն կերպ աջակցի, որպեսզի հայերն իրենց շարունակեն հայ զգալ։ Որքան ակտիվ են նրանք իրենց դրսևորում համայնքում, այնքան ավելի շատ են փորձում միմյանց թև ու թիկունք լինել։ Սա վերաբերում է նաև ընտանիք ստեղծելուն, ավելացրեց նա։
«Ցավոք, մեր ազգը միավորվում են միայն ամենադժվար պահերին։ Այդպես է եղել 1988 թվականի երկրաշարժի և Արցախյան շարժման ժամանակ»,–, ընդգծեց նախարարը։