ԵՐԵՎԱՆ, 19 հունվարի — Sputnik. 2020 թվականից Հայաստանում կվերանա էլեկտրաէներգիայի վաճառքի մենաշնորհը։ «Էներգետիկայի մասին» օրենքում համապատասխան փոփոխությունների մասին նախագիծը քննարկվում է խորհրդարանում։
Օրենքը պետք է ուժի մեջ մտնի 2018 թվականի հուլիսի 1-ից։ Իսկ նոր մատակարարների համար կանոնները կմշակեն մինչև 2020 թվականը։
««Հայաստանի էլեկտրական ցանցեր» ընկերությունը (պատկանում է ռուսաստանցի միլիարդատեր Սամվել Կարապետյանին) շուկայից չի հեռանա։ Իր ֆիքսված սակագնով կմնա որպես «վերջին ապաստան» այն մարդկանց համար, որոնք վախենում են շուկայի տատանումներից, Sputnik Արմենիայի թղթակցին ասաց Էներգետիկ ենթակառուցվածքների և բնական պաշարների փոխնախարար Հայկ Հարությունյանը։
Հանրապետությունում էլեկտրական մեկ ցանց կլինի (իմաստ չունի հազարավոր կիլոմետրերով զուգահեռ լարեր անցկացնել)։ Բայց այժմ բուն «Էլեկտրական ցանցերից» բացի, դրա միջոցով կաշխատեն նաև այլ մատակարարներ։ Սակայն «Էլեկտրական ցանցերը» չպետք է դրանց շուկայից դուրս մղի չարդարացված բարձր վարձակալության պատճառով։
Արդյո՞ք մենք այլ օպերատորներին ավելի քիչ կվճարենք։ Հիմա բնակչության համար (բացառությամբ անապահով ընտանիքների) էլեկտրականությունն արժի 45 ու 35 դրամ (ցերեկային ու գիշերային սակագին)։ Նպաստով ապրող ընտանիքների համար սակագինն ավելի ցածր է, բարձր լարվածության բաժանորդների համար` ավելի քիչ։ «Էլցանցերը» մեկ կիլովատ ժամից միջինը ստանում է 14,1 դրամ կամ մեր ցերեկային սակագնի գրեթե կեսը։
Հնարավո՞ր է` այլ օպերատորներն օգնեն մեզ տնտեսել։ Սա պարզելու համար էներգետիկայի նախարարությունը մոտ մեկ տարի համակարգչային բարդագույն ծրագրով հաշվելու է շուկայական մրցակցությունը։
Վաճառողներից մեկն արդեն ստեղծվել է` «Էներգոիմպեկս» ընկերությունը, որն առայժմ միայն մեծածախ շուկայում է աշխատում։
Էլեկտրաէներգիայի ազատ վաճառքի են ուզում անցնել նաև եվրասիական տարածքում։ Եվրասիական տնտեսական հանձնաժողովում արդեն մտածում են մեծածախ առևտրի ընդհանուր հարթակ ստեղծելու մասին։