ԵՐԵՎԱՆ, 15 հունվարի — Sputnik. Հայաստանի Քննչական կոմիտեն հետաքննում է քրեական հեղինակություն համարվող Ճվճըվ Արոյի որդու` Սարգիս Վարդանյանի մասնակցությամբ աղմկահարույց դեպքը, երկուշաբթի լրագրողներին ասաց ՔԿ ղեկավարի տեղակալ Արթուր Ղամբարյանը։
Մեկնաբանության համար առիթ են դարձել այն լուրերը, որ ՔԿ Արաբկիրի շրջանի բաժնի պետն արդեն հովանավորել է Սարգիս Վարդանյանին, ինչպես նաև նրա եղբայր Սերժին։
Ղամբարյանի խոսքով` Հայաստանի ՔԿ-ն չի հովանավորել Արա Վարդանյանի երեխաներին։ Պաշտոնյան խոստովանեց, որ «ընթանում է քննություն» արտահայտությունը վստահություն չի առաջացնում մարդկանց մոտ, սակայն Վարդանյանների գործը «այդ դեպքը չէ», որպեսզի լռությամբ պահեն համազգեստի պատիվը։
Նախնական քննության տվյալներով՝ հունվարի 8-ին՝ ժամը 04:40-ի սահմաններում, Երևան քաղաքի Սայաթ-Նովա պողոտայի և Աբովյան փողոցի խաչմերուկում բախվել են «ԲՄՎX6» մակնիշի, 35 NT 388 հաշվառման համարանիշի և «Տոյոտա» մակնիշի, 243 II 02 հաշվառման համարանիշի ավտոմեքենաները, որից հետո «ԲՄՎX6» մակնիշի ավտոմեքենան դուրս է եկել երթևեկելի գոտուց և հարվածել գովազդային վահանակին: Ավտովթարի հետևանքով «Տոյոտա» մակնիշի, 243 II 02 հաշվառման համարանիշի ավտոմեքենայի վարորդ՝ ՃՈ 1-ին գումարտակի 6-րդ դասակի տեսուչ, ոստիկանության ավագ լեյտենանտ Արեգ Դավթյանը և ուղևոր՝ ոստիկանության լեյտենանտ Խաչիկ Գասպարյանը, ստացած մարմնական վնասվածքներից մահացել են։
Ավտովթարից հետո «ԲՄՎX6» մակնիշի ավտոմեքենայի վարորդը, թողնելով ճանապարհատրանսպորտային պատահարի վայրը, հեռացել է:
Քրեական գործով ձեռք բերված ապացույցների հիման վրա՝ «ԲՄՎX6» մակնիշի ավտոմեքենայի վարորդ Ս.Վարդանյանին այսօր մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասով և 244-րդ հոդվածով՝ 2 մարդու մահ առաջացրած ճանապարհային երթևեկության կանոնները խախտելու և ճանապարհատրանսպորտային պատահարի վայրը թողնելու համար։ Քննիչը միաժամանակ որոշում է կայացրել՝ մեղադրյալի նկատմամբ որպես խափանման միջոց կալանավորումն ընտրելու վերաբերյալ միջնորդություն ներկայացնել դատարան։
Նախաքննությունը շարունակվում է։ Ձեռնարկվում են անհրաժեշտ քննչական գործողություններ՝ դեպքի բոլոր հանգամանքները պարզելու ուղղությամբ։