ԵՐԵՎԱՆ, 15 հունվարի — Sputnik. Հայաստանի խորհրդարանական ուժերը համակարծիք են` եզդի ժողովրդի նկատմամբ իրականացված ահաբեկչական գործողությունները ցեղասպանություն են և պետք է դատապարտվեն։
«Ահաբեկչական խմբավորումների կողմից իրենց վերահսկողության ներքո գտնվող Իրաքի Հանրապետության տարածքներում եզդի ժողովրդի նկատմամբ 2014թ. իրականացված ցեղասպանության դատապարտման մասին» նախագիծը խորհրդարանի հաստատմանն են ներկայացրել պատգամավոր Ռուստամ Մախմուդյանը (ազգությամբ` եզդի), ՀՀԿ խմբակցության ղեկավար Վահրամ Բաղդասարյանը և ՀՅԴ խմբակցության ղեկավար Արմեն Ռուստամյանը։ Նախաձեռնությանը միացել են նաև «Ծառուկյան» և «Ելք» խմբակցությունները:
Նախագծի հեղինակ Ռուստամ Մախմուդյանը, ներկայացնելով նախագիծը, կոչ արեց «ոչ միայն դատապարտել եզդի ժողովրդի նկատմամբ կատարված ցեղասպանությունը, այլև միջազգային կառուցակարգերի միջոցով հետաքննել կատարված հանցագործությունները, հետապնդել և պատասխանատվության ենթարկել միջազգային հանցագործություն կատարած մարդկանց և ձեռնարկել քայլեր ապագայում նման դրսևորումները կանխելու համար»։
Մախմուդյանը հիշեցրեց, որ 2014թ.-ի օգոստոսի 3-ին Իրաքի Սինջար քաղաքի վրա հարձակումներ էին իրականացվել, որոնց զոհ էին դարձել շուրջ 800 եզդի, ևս 5000 կանանց ու աղջիկների առևանգել և ստրկության ու սեռական շահագործման էին ենթարկել։ Այս բոլոր հանցագործություններն, ըստ նախաձեռնության հեղինակների, տեղավորվում են «ցեղասպանություն» եզրույթի տակ և համադրելի են 1915թ. հայ ժողովրդի նկատմամբ կատարված հանցանքի հետ:
Խորհրդարանականները ողջունեցին օրենսդրական նախաձեռնության գաղափարն ու աջակցություն հայտնեցին դրա հեղինակներին։
Նախագիծը քննարկման կդրվի վաղը` հունվարի 16-ին։