ԵՐԵՎԱՆ, 12 հունվարի — Sputnik. Մարդու իրավունքների պաշտպանի ներկայացուցիչների այցից հետո Արմեն Բիլյանը դադարեցրել է հացադուլը։ Այս մասին հայտնում է ՄԻՊ մամուլի ծառայությունը։
«Մարդու իրավունքների պաշտպանի աշխատակազմի ներկայացուցիչների ուղեկցությամբ նա տեղափոխվել է «Դատապարտյալների հիվանդանոց» քրեակատարողական հիմնարկ»,- նշված է հաղորդագրության մեջ։
Բիլյանն այս պահին անցնում է անհրաժեշտ բժշկական զննություն, ինչպես նաև ստացել է հացադուլից դուրս գալուց հետո սննդակարգի վերաբերյալ համապատասխան խորհրդատվություն:
Հետհացադուլային փուլում նրա առողջական վիճակը, ինչպես նաև նրա իրավունքների ապահովման հարցը Պաշտպանը կշարունակի պահել իր ուշադրության կենտրոնում։
Նշենք, որ «Սասնա ծռերի» անդամներ Արմեն Բիլյանն ու Սմբատ Բարսեղյանն ավելի քան 20 օր հացադուլ էին անում։ Որոշ տեղեկություններով` նրանք պահվում են 6 հոգանոց խցում, որտեղ 13 կալանավոր կա։
Հացադուլավորներն ու նրանց համակիրները ՔԿՀ վարչության ղեկավարներից պահանջում էին պատշաճ պայմաններ ապահովել խմբի անդամների համար և «Նուբարաշենից» տեղափոխել «Արմավիր» ՔԿՀ։
Հիշեցնենք, որ 2016թ-ի հուլիսի 17-ին վաղ առավոտյան «Սասնա ծռեր» խմբի անդամները բեռնատար ավտոմեքենայով ջարդել էին ոստիկանական ՊՊԾ գնդի մուտքի դարպասները, ներս մտել գնդի տարածք ու գրավել այն։
Խումբը պահանջում էր Սերժ Սարգսյանի հրաժարականն ու քաղբանտարկյալների ազատ արձակումը։ 14 օր տևած պաշարումից և մարդկային մի քանի կորուստներից հետո խմբի անդամները վայր դրեցին զենքերն ու հանձնվեցին իրավապահներին։