Խաչիկ Չախոյան, Sputnik.
Անգլիական լրատվամիջոցները միաբերան նշում են, որ Լոնդոնի «Արսենալի» հարձակվող Ալեքսիս Սանչեսը մեկնելու է Մանչեսթեր քաղաք, բայց արդեն ոչ թե «Սիթի» ակումբ, այլ «Յունայթեդ»: Ժոզե Մոուրինյոնի ակումբը չիլիացուն ավելի բարձր գումար է առաջարկել տրանսֆերի համար և ավելի բարձր անհատական աշխատավարձ:
Իհարկե, Ալեքսիս Սանչեսի տեղափոխությունը «Մանչեսթեր Յունայթեդ» հայ երկրպագուների համար ինչ-որ արտասովոր նշանակություն չունի, բայց չմոռանանք, որ մի քանի օր առաջ Մոուրինյոն առաջարկում «Արսենալին» փոխանակել Սանչեսին Մխիթարյանով:
Բրիտանական հեղինակավոր պարբերականները նշում են, որ «Մանչեսթեր Յունայթեդը» արդեն բանակցում է «Արսենալի» հետ, ու Սանչեսի տեղափոխությունը «Յունայթեդ» շատ մոտ է իրականանալուն, քանի որ Մոուրինյոյի ակումբը ավելի բարձր գումար է առաջարկել տրանսֆերի համար, քան «Սիթին»: Հիշեցնենք, որ մի քանի օր առաջ բոլորն արդեն նշում էին, որ Սանչեսի համար «Սիթին» առաջարկել է 20 մլն ֆունտ, և չիլիացին, ամենայն հավանականությամբ, համալրելու է Պեպ Գվարդիոլայի թիմը:
Սակայն, ինչպես նշում է Sky Sports-ը, «Մանչեսթեր Յունայթեդը» Սանչեսի տեղափոխման համար առաջարկել է 25 մլն ֆունտ և ավելի բարձր աշխատավարձ չիլիացուն, և վերջինս կհայտնվի կարմիր սատանաների կազմում: Ստացվում է, որ Հենրիխ Մխիթարյանի տրանսֆերը դեպի «Արսենալ» նույնպես կարող է կայանալ:
«Մանչեսթեր Յունայթեդը» հայ կիսապաշտպանի տրանսֆերի համար սահմանել էր 30-35մլն ֆունտ (տարբեր տվյալներով): Բայց եթե փոխանակություն իրականացվի, ապա ամեն ինչ անհամեմատ հարթ կանցնի, ու Հենրիխը կդառնա «Արսենալի» ֆուտբոլիստ: Հենրիխի` «Արսենալ» տեղափոխվելու միակ խոչընդոտը կարող է դառնալ հայ ֆուտբոլիստի բարձր աշխատավարձը: