ԵՐԵՎԱՆ, 11 հունվարի — Sputnik. Հայտնի երգիչ Ռիկի Մարտինն ամուսնացել է քրդահայ Ջվան Յոսեֆի հետ։ Արտիստն այս մասին հայտնել է Enews պարբերականին։
«Ես հիմա ամուսին եմ։ Մենք երդում ենք տվել, ստորագրել բոլոր փաստաթղթերը, որոնք պետք է ստորագրեինք` ամուսնական պայմանագիր և այլն։ Մի քանի ամիս անց մենք մեծ երեկույթ կանցկացնենք», — ասել է Մարտինը։
Չնայած նրան, որ պաշտոնական արարողություն չի կայացել, 46-ամյա երգիչն ասում է, որ իրենք հնարավոր ամեն ինչ արել են, որպեսզի նախապատրաստվեն այդ առանձնահատուկ իրադարձությանը։
Մի քանի օր առաջ 46-ամյա Մարտինը կարմիր գորգին հայտնվել էր իր նշանածի հետ։ Մարտինը պատմել էր իր 9 տարեկան երկվորյակ տղաների` Վալենտինոյի և Մատեոյի մասին, ասել, որ Յոսեֆը հիանալի հարաբերություններ ունի նրանց հետ։
Լրագրողի այն հարցին, թե արտիստը նախատեսո՞ւմ է արդյոք էլի երեխաներ ունենալ, նա պատասխանել էր, որ շատ կուզեր մեծ ընտանիք ունենալ։
Նկարիչ քրդահայի հետ նշանադրության մասին Մարտինը կես տարի առաջ էր հայտարարել։
Սա Հարավային Կովկասի ներկայացուցիչների մասնակցությամբ առաջին միասեռական ամուսնությունը չէ։ Ավելի վաղ համացանցի օգտատերերին ապշեցրել էր ԱՄՆ-ում կայացած վրացական գեյ հարսանիքը։