ԵՐԵՎԱՆ, 11 հունվարի — Sputnik. Արգենտինայի ամենահարուստ մարդկանցից մեկը` հայտնի գործարար Էդուարդո Էռնեկյանը, որ «Corporacion America Airports SA» ընկերության սեփականատերն է, որոշել է օդանավակայանների կառավարումը հանձնել զարմիկին` Մարտին Էռնեկյանին։ Այս մասին հայտնում է Bloomberg-ը։
«Ես որոշել եմ IPO անցկացնել (բաժնետիրական ընկերության բաժնետոմսերի առաջին հրապարակային վաճառք)։ Օդանավակայանները կկառավարի զարմիկս։ Ես կհետևեմ ամսվա վերջին նախատեսված գործարքին։ Ես իմ կարիերան ավարտում եմ օդանավակայանների ոլորտում»,- ասել է Էռնեկյանը։
Պարբերականը գրում է, որ բաժնետոմսերի վաճառքն առանցքային նշաձող է մագնատի կարիերայում, քանի որ նա էստաֆետը հանձնում է իր ընտրած մարդուն։
Corporacion America Airports SA խոշոր կորպորացիան, որի տնօրինության տակ 51 օդանավակայան կա, պատրաստվում է 750 միլիոն դոլարի բաժնետոմս վաճառել հունվարի վերջին ու փետրվարին։ Այս մասին հայտնել է կորպորացիայի մամուլի քարտուղար Կարոլինա Բարոսը։ Սա ընկերության առաջին IPO-ն կլինի այս տարում։
Այս քայլը նոր էջ կբացի Էռնեկյանի համար։ 85 տարեկան գործարարը, որն ամեն օր լողում է և զբաղվում յոգայով, վերջնականապես չի հեռանա բիզնեսից։ Նա հայտնել է, որ կսկսի բիզնեսի նոր ուղղություններ ուսումնասիրել։