ԵՐԵՎԱՆ, 5 հունվարի — Sputnik. Ամանորը ստիպում է միանգամից մի շարք նվերներ ընտրել տարբեր մարդկանց համար, ինչը երբեմն վատ հետևանքներ է ունենում:
Sputnik Արմենիան ներկայացնում է այն նվերների ցանկը, որոնցից արժի հրաժարվել, եթե դուք ծանոթ չեք նվեր ստացողի ճաշակին:
«Վատ նվերներ չեն լինում» կամ «ցանկացած նվերի համար պետք է շնորհակալ լինես» արտահայտությունները վաղուց արդեն կորցրել են իրենց արդիականությունը: Մարդիկ մանրամասն զննում են նվերները և նույնիսկ կռվում դրանց պատճառով: Վատ նվերն Ամանորը փչացնելու ամենահեշտ տարբերակն է:
Հուշանվերներ
Ցանկացած հուշանվեր (հատկապես Ամանորի թեմայով) նվիրողի համար կարող է լավ լուծում թվալ ոչ այդքան հարազատ մարդուն տալու համար: Բայց պետք է խոստովանել, որ հուշանվերը բացարձակ անիմաստ նվեր է:
Հիգիենայի պարագաներ. շամպուն, լոգարանի փրփուր, օճառ, քսուքներ և այլն
Այսպիսի նվերը կարող է որպես ակնարկ ընկալվել (հաճախ հենց այդպես էլ լինում է): Այս տարբերակը փնտրտուքից «գլուխն ազատելու» շատ լավ փորձ է, բայց ամեն դեպքում այսպիսի նվերն առանձնակի ոգևորությամբ չի ընդունվի:
Բիժուտերիա
Մարդիկ թանկարժեք մետաղներից պատրաստված զարդերը սիրով են ընդունում, անգամ եթե անճաշակ մի բան է: Իսկ եթե ուզում եք մանր-մունր զարդեր նվիրել, պետք է երկար մտածեք նվեր գնելուց առաջ, որպեսզի «ի՜նչ գեղեցիկ է» արտահայտությունն անկեղծ հնչի: Եթե մարդու ճաշակը հստակ չգիտեք, ավելի լավ է հրաժարվեք բիժուտերիայից:
Ընտանի կենդանի
Եթե ապագա տիրոջը չեք զգուշացրել, ապա սա հաստատ վատագույն նվերն է, եթե չասենք` դաժան։ Կարող է նաև այնպես ստացվել, որ կենդանին հանկարծ դուր չգա նրան, ում նվիրում եք: Ի՞նչ կլինի այդ դեպքում խեղճ կենդանու հետ:
«Անշունչ» կենդանի
Փափուկ խաղալիքներ կարելի է նվիրել կամ ստանալ մանուկ հասակում: Հետո դրանք հավանաբար կարելի է նվիրել միայն ռոմանտիկ հարաբերությունների ամենասկզբում: Այն էլ` ոչ բոլորին:
Էժանագին օծանելիք
Ավելի գերադասելի է հրաժարվել նաև այս նվերից: Լավագույն դեպքում այն «կծառայի» զուգարանին:
Հրուշակեղեն
Հաճախ դրանք կոնֆետ, շոկոլադ կամ այլ հրուշակեղեն հիշեցնող բացարձակ անհամ բաներ են: Բացի այդ, նաև հարց է ծագում նվիրողի երևակայության մասին: Չափից ավել հասարակ և անտեղի նվեր է, հատկապես, որ Ամանորի սեղանին քաղցրավենիքի պակաս հաստատ չկա:
Գուլպաներ կամ ներքնազգեստ
Պետք է երկար փնտրել գուլպա նվեր ստանալուց երջանկացող որևէ մեկին գտնելու համար:
Բացիկ
Պարզվում է, որ բացիկներ դեռ նվիրում են: Բայց սա շատ նման է գուլպա նվիրելուն:
hand-made
Այսպիսի նվերը դժվար թե գնահատեն ըստ արժանվույն, եթե նույնիսկ շատ լավ է ստացվել։ Ուրիշի աշխատանքը գնահատելը հեշտ գործ չէ։ Իսկ եթե նվիրողը հմուտ չէ այդ գործում, գործն ավելի է բարդանում:
Բոլոր դեպքերում կան բացառություններ, քանի որ ոմանք սիրում են ձեռագործ աշխատանքներ: Սակայն նրանց հանդիպելու հավանականությունը, ինչպես ցույց է տալիս վիճակագրությունը, բավականին փոքր է:
Այս ցանկում չենք ներառել առավել ինքնատիպ նվերները, օրինակ` բահ, ատամի պրոթեզների սոսինձ, ցելյուլիտի քսուք և մի շարք այլ բաներ. չէ՞ որ մարդու երևակայությունն անսահման է:
Երբեմն ավելի լավ է ուղիղ հարցնել, թե ինչ նվեր կուզեր ստանալ դիմացինը…