Արամ Գարեգինյան, Sputnik
Հայաստանում 2018 թվականից կփոխվի առանձին անհատների կողմից (ոչ բիզնեսի) ավտոմեքենաների վաճառքից ստացվող հարկերի մասին օրենքը: Գնորդներին այս փաստը կարող է ուրախացնել, իսկ վաճառողներին` ոչ այնքան: Սկսենք լավ նորությունից:
Հունվարի 1-ից գործող հարկային օրենսգրքի համաձայն` ձեզանից հարկ չեն գանձի, եթե դուք վաճառեք ավտոմեքենան գնելուց երեք կամ ավելի ամիս անց: Մինչև 2018 թվականն ավտոմեքենան հնարավոր էր վաճառել առանց հարկի միայն օրացուցային տարվա մեջ մեկ անգամ: Այլ կերպ ասած, եթե մենք ավտոմեքենան վաճառել էինք մարտին, նորը գնել էինք ապրիլին և հետո մտափոխվել էինք ու որոշել էինք նորից վաճառել, ապա ստիպված էինք սպասել մինչև մյուս հունվար` հարկ չվճարելու համար: Իսկ այժմ բավական է սպասել երեք ամիս:
Սակայն, եթե մենք նույնիսկ չսպասենք, ավելի քիչ հարկ ենք վճարելու` ոչ թե 20% ԱԱՀ, այլ 10% եկամտահարկ:
Լա՞վ է: Որևէ լավ բան այստեղ չկա, առարկում է «Ավտովարորդների պաշտպանության լիգա» ՀԿ-ի ղեկավար Տիգրան Հովհաննիսյանը: Լիգան միավորում է միայնակ ավտովաճառողներին, որոնք տարեկան մի քանի ավտոմեքենա են վաճառում և չեն գրանցվում հարկայինում:
«Երբ մենք ավտոմեքենաները ներմուծեցինք վաճառքի համար, մենք վճարեցինք առաջին ԱԱՀ-ն ներմուծման ժամանակ: Իսկ երբ վաճառեցինք, երկրորդ ԱԱՀ-ն ձևավորվեց վաճառքից: Ահա այդ երկրորդ ԱԱՀ-ից մեզ թույլ տվեցին հանել առաջինը: Իսկ եկամտահարկից այլևս պահում չի լինի: Այդ պատճառով էլ կարծես թե հարկն ավելի ցածր է, իսկ մեզ` վաճառողներիս համար ստացվում է, որ ավելի վատ է», — ասաց նա:
Ելք կա. գրանցվել որպես անհատ ձեռներեց և պարբերաբար հարկ վճարել: Այդ ժամանակ նաև պահում կլինի: Բայց վճարելու գումար չի մնում, վստահեցնում է Հովհաննիսյանը:
«Մեր վաճառողները հինգ, առավելագույնը տասը տոկոս են ավելացնում ավտոմեքենաների գնին: Այլապես ոչ ոք չի գնի: Որտեղի՞ց գումար մարդկանց: Եվ ստացվում է, որ աշխատեցիր քո 10 տոկոսը, հետո հետ վճարեցի՞ր: Եվ ինչպե՞ս ապրել այդ դեպքում», — ասաց Հովհաննիսյանը:
Լիգան մտադիր է իր դժգոհությունը հերթական անգամ հայտնել տրանսպորտի և ֆինանսների նախարարություններին:
Նշենք, որ վիճակագրական տվյալների համաձայն` Հայաստան ներկրվող ավտոմեքենաների ավելի քան 80%-ը 7 տարեկանից մեծ են, իսկ դա նշանակում է, որ դրանք ոչ թե պաշտոնական դիստրիբյուտորական սրահներն են վաճառում, այլ անհատ ներկրողները: