ԵՐԵՎԱՆ, 3 հունվարի — Sputnik. Սաուդյան Արաբիայի արքայազն Թալալ իբն Աբդուլ Ազիզ ալ Սաուդը, որի մայրը Օսմանյան կայսրությունից փախած հայ է, հացադուլ է հայտարարել՝ բողոքելով իր երեք որդու ձերբակալության դեմ։ Այս մասին հայտնում է Middle East Eye-ը։
86 տարեկան արքայազնը նոյեմբերի 10-ից սնունդ չի ընդունել։ Նոյեմբերի 4-ին հակակոռուպցիոն արշավի շրջանակում ձերբակալվել է նրա առաջին որդին՝ Ալ Վալիդ իբն Թալալ Ալ Սաուդը, բայց այդ մասին պաշտոնապես չի հայտարարվել։
Պարբերականը նշում է, որ հացադուլի ժամանակ արքայազնը 10 կգ նիհարել է, թագավոր Ֆեյսալի անվան հիվանդանոցի բժիշկները նրան արհեստական սննդի խողովակ են միացրել։ Սակայն արքայազնը, միևնույն է, թույլ է։
Նշվում է, որ հոսպիտալում պառկած արքայազնին այցելել է Սաուդյան Արաբիայի արքան` նրա խորթ եղբայր Սալման իբն Աբդուլ Ազիզ ալ Սաուդը, որը համբուրել է Թալալի ձեռքը։ Արաբական ԶԼՄ-ները հրապարակել են մի լուսանկար, որում Սալման թագավորը համբուրում է Թալալի ձեռքը։
Սաուդյան Արաբիայում 2017թ-ի նոյեմբերի 4-ին այդ երկրի թագավոր Սալման իբն Աբդուլ Ազիզ ալ Սաուդի հրամանով ստեղծվել է Հակակոռուպցիոն կոմիտե, որն իր աշխատանքի առաջին օրերի ընթացքում կաշառակերության և փողերի լվացման մեջ մեղադրանքներ է առաջադրել տասնյակ մարդկանց, այդ թվում՝ 11 արքայազնի, մի քանի նախարարների և շուրջ 50 նախկին նախարարի։ Մեղադրվողներից մեկն արքայազն Ալ Վալիդ իբն Թալալն է՝ Մերձավոր Արևելքի ամենահարուստ մարդկանցից մեկը, որի կարողությունը գնահատվում է 21,5 միլիարդ դոլար։
Արքայազն Թալալ իբն Աբդուլ Ազիզը Սաուդյան Արաբիայի թագավոր Աբդուլ Ազիզի 20-րդ որդին է, որի մայրը հայ է։ Թալալի մայրը՝ Մունայիրը, փրկվել է Հայոց ցեղասպանությունից։ 12 տարեկանում Մունայիրին ներկայացրել են Աբդուլ Ազիզ արքային, 15 տարեկանում նա ծնել է առաջնեկին, որը մահացել է երեք տարեկանում։ Երկրորդ որդուն՝ Թալալին, Մունայիրը լույս աշխարհ է բերել 22 տարեկանում։