ԵՐԵՎԱՆ, 4 մայիսի – Sputnik․ ԱՄՆ նախագահ Դոնալդ Թրամփի որոշումներն ու զորքերի դուրսբերումն ուղերձ են եվրոպական համայնքի համար։ Եվրոպական քաղաքական համայնքի 8-րդ գագաթնաժողովից առաջ լրագրողների հետ ճեպազրույցում այս հայտարարությունն արեց Ֆրանսիայի նախագահ Էմանուել Մակրոնը։
«Մենք ամրապնդում են մեր անվտանգությունն ու պաշտպանությունը։ Թրամփի որոշումներն ու զորքերի դուրսբերումն ուղերձ են մեզ համար։ Մենք պետք է սեփական պաշտպանական լուծումներ գտնենք»,- ասաց Մակրոնը։
Ավելի վաղ Պենտագոնը հայտնել էր, որ ԱՄՆ-ն առաջիկա 6-12 ամիսների ընթացքում Գերմանիայից դուրս կբերի 5 հազար ամերիկացի զինծառայողի: Ավելի ուշ ԱՄն նախագահ Թրամփը հայտարարեց, որ Գերմանիայում ամերիկյան զորակազմը կկրճատվի ավելի քան 5 հազարով։
Մայիսի 3-ին էլ Գերմանիայի կանցլեր Ֆրիդրիխ Մերցը հայտարարեց, որ ԱՄՆ-ի կողմից իր զորակազմի մի մասի դուրսբերումը կապ չունի Իրանի շուրջ տարաձայնությունների հետ: Նա նշեց, որ ԱՄՆ նախկին նախագահ Ջո Բայդենի օրոք ամերիկյան զորքերը Գերմանիայում զուտ ժամանակավոր էին տեղակայվել, և զորքերը դուրս բերելու հարցի շուրջ վաղուց են բանակցում։
Հիշեցնենք` Եվրոպական քաղաքական համայնքի գագաթնաժողովն անցկացվում է Երևանում մայիսի 4-ին:
Sputnik Արմենիան ԵՔՀ գագաթնաժողովի հավատարմագրում այդպես էլ չստացավ, թեև պաշտոնական մերժում նույնպես չի եղել և թույլտվություն չտալու պատճառ չի նշվել։ ՀՀ ԱԳՆ-ից մեզ պատասխանեցին, որ մենք «համակարգում չկանք»: