ԵՐԵՎԱՆ, 30 ապրիլի – Sputnik. ԱՄՆ պաշտպանության նախարար Փիթ Հեգսեթը հերքել է այն պնդումները, թե ամերիկյան վարչակազմը մտադիր է լրացուցիչ 200 միլիարդ դոլար պահանջել Իրանի դեմ գործողությունների համար:
ԱՄՆ Կոնգրեսի Սենատի զինված ուժերի հարցերով հանձնաժողովում կայացած լսումների ժամանակ սենատոր Քիրստեն Ջիլիբրանդը Հեգսեթին խնդրել է մեկնաբանել նման ծավալով լրացուցիչ ֆինանսավորման հայտի մասին տեղեկությունները: Ի պատասխան Պենտագոնի ղեկավարը հայտարարել է. «Մենք 200 միլիարդ դոլար չենք խնդրել: Ես չգիտեմ, թե որտեղից եք վերցրել այդ գումարը: Կարծում եմ՝ լուրերում եք տեսել, ես խորհուրդ եմ տալիս զգուշություն ցուցաբերել լուրերի աղբյուրների ընտրության հարցում»:
Միևնույն ժամանակ Ներկայացուցիչների պալատի զինված ուժերի հարցերով հանձնաժողովում անցկացված լսումների ժամանակ Հեգսեթը հնարավոր էր համարել, որ ԱՄՆ վարչակազմը կարող է խոշոր հայտ ուղարկել Պենտագոնի լրացուցիչ ֆինանսավորման համար: Նա նշել էր, որ Իրանի դեմ ռազմական գործողությունը շարունակելու համար կպահանջվի շուրջ 25 միլիարդ դոլար, և միջոցների հիմնական մասը կնախատեսվի զինանոցների համալրման համար: Հնարավոր հարցման կոնկրետ ընդհանուր ծավալը նա չէր հստակեցրել:
Ավելի վաղ «The Washington Post»-ը հայտնել էր, որ ԱՄՆ զինվորականները փորձում են ավելի քան 200 միլիարդ դոլարի հատկացում ստանալ Իրանի դեմ գործողության հետագա իրականացման համար: Ապրիլի սկզբին պարբերականը նաև տեղեկացրել էր, որ վարչակազմը կարող է հայցվող գումարը կրճատել մինչև 80–100 միլիարդ դոլար:
Հիշեցնենք` ԱՄՆ–ն ու Իսրայելը փետրվարի 28-ի առավոտյան սկսեցին հարվածներ հասցնել Իրանին։ Ապրիլի 8-ին ԱՄՆ նախագահ Դոնալդ Թրամփը համաձայնեց երկու շաբաթով դադարեցնել Իրանի ուղղությամբ հարվածները և հավաստիացրեց, որ հրադադարը կլինի երկկողմանի։ Թեհրանն էլ հայտարարեց, որ ԱՄՆ-ի հետ բանակցություններ կսկսի Իսլամաբադում (Պակիստան) իրանական կողմի առաջարկած 10 կետերի շուրջ։
Ապրիլի 12-ին հայտնի դարձավ, որ բանակցություններն արդյունք չեն տվել, պատվիրակությունները հեռացել են Պակիստանից։
ԱՄՆ նախագահ Դոնալդ Թրամփը ապրիլի 22-ին հայտարարեց, որ Պակիստանի խնդրանքով որոշել է երկարաձգել հրադադարը, բայց Իրանի ծովային շրջափակումը կշարունակվի։