«Հայաստան» դաշինքը կաջակցի առավել շատ ձայներ հավաքած ընդդիմադիր ուժին. Արծվիկ Մինասյան

ԵՐԵՎԱՆ, 23 ապրիլի – Sputnik. Այն ընդդիմադիր ուժի վարչապետի թեկնածուն, որը կստանա առավել շատ ձայներ, կստանա «Հայաստան» դաշինքի աջակցությունը։ Այս մասին այսօր լրագրողների հետ զրույցում հայտարարեց ԱԺ «Հայաստան» խմբակցության քարտուղար Արծվիկ Մինասյանը։ Նա հավելեց, որ նույն մոտեցումն են ակնկալում նաև մյուս ուժերից, եթե հաղթեն իրենք։

Արծվիկ Մինասյանը հայտնեց, որ «Հայաստան» դաշինքի պատգամավորության թեկնածուների համամասնական ցուցակում ընդգրկված է 213 մարդ, որից 70–ը` «Առաջ» կուսակցությունից, իսկ 143-ը՝ Հայ հեղափոխական դաշնակցությունից։ Պատգամավորը բացատրեց, որ վարչապետի թեկնածու Ռոբերտ Քոչարյանը առաջադրվել է «Առաջ» կուսակցության ցուցակով, բայց շարունակում է մնալ անկուսակցական։

Խոսելով իրենց դաշինքի հասցեին այլ ընդդիմադիր ուժերի քննադատությունների մասին` Մինասյանը նշեց, որ իրենք հարգում են քննադատությունը, բայց ձգտում են բաց պահել իշխանափոխության համար համագործակցության դուռը:

Արծվիկ Մինասյանը վստահեցրեց, որ «Հայաստան» դաշինքի, «Ուժեղ Հայաստան» դաշինքի և «Բարգավաճ Հայաստան» կուսակցության միջև որևէ համաձայնություն չկա, որ ՀՀ երկրորդ նախագահ Ռոբերտ Քոչարյանը լինելու է վարչապետի համատեղ թեկնածու։

Հիշեցնենք` ՀՀ–ում հերթական խորհրդարանական ընտրությունները կկայանան 2026 թվականի հունիսի 7-ին։ Ապրիլի 23–ի տվյալներով` առաջադրման հայտ են ներկայացրել 8 կուսակցություն և 1 դաշինք`«Քաղաքացիական պայմանագիր» կուսակցությունը, «Բարգավաճ Հայաստան» կուսակցությունը, Հայաստանի շնորհապետական կուսակցությունը, «Բոլորին դեմ եմ» ժողովրդավարական կուսակցությունը, «Միասնության թևեր» կուսակցությունը, «Ժողովրդավարական համախմբում» կուսակցությունը, «Լուսավոր Հայաստան» կուսակցությունը, «Ազգային ժողովրդավարական բևեռ» համահայկական կուսակցությունը, «Ուժեղ Հայաստան» դաշինքը (որի կազմում «Ուժեղ Հայաստան», «Նոր դարաշրջան», «Միավորված հայեր» կուսակցություններն են)։