ԵՐԵՎԱՆ, 23 ապրիլի — Sputnik. ՀՀ Լոռու մարզի Գյուլագարակ համայնքի նախկին ղեկավարի խորհրդական Վ․Ա․-ն 8 հողամաս է հափշտակել, որոնք վերադարձվել են համայնքին։ Տեղեկությունը հայտնում է ՀՀ քննչական կոմիտեի մամուլի ծառայությունը։
«Նախաքննության ընթացքում պարզվել է, որ Վ.Ա.-ն, օգտվելով համայնքի ղեկավարի բացակայության հանգամանքից, 2021 թվականի հուլիսի 13-ին կազմել է համայնքի ղեկավարի կողմից տրվող՝ Գյուլագարակում գտնվող 8 հողամասի հիմքերը վերականգնելու և իր ծնողին՝ Ա․Մ․-ին, հողամաս վերահատկացնելու մասին կեղծ որոշումներ։ Նույն տարվա նոյեմբերին Ա․Մ․-ն կեղծ որոշումներով 8 հողամասի սեփականության իրավունք է ձեռք է բերել, իսկ Վ.Ա.-ն դեկտեմբերի 15-ին իր և Ա.Մ.-ի միջև անշարժ գույքի նվիրատվության պայմանագրեր է կնքել»,- ասված է հաղորդագրությունում։
Վ.Ա.-ն 4 մլն 250 հազար 400 դրամով 8 անշարժ գույքի նկատմամբ ձեռք է բերել սեփականության իրավունք՝ խարդախությամբ հափշտակելով հողամասերը։
Բացի այդ, նա 2021 թվականի սեպտեմբերի 13-ին կազմել է նաև այդ հողամասերի չափագրման հատակագծեր, որոնցում Գյուլագարակի ղեկավարի անունից կատարվել են կեղծ գրառումներ։ Փաստաթղթում ստորագրվել է տվյալ պահին համայնքի ղեկավար չհանդիսացող Մ.Գ.-ի անվան դիմաց, և դրվել Գյուլագարակի համայնքապետարանի աշխատակազմի կնիքը, այնինչ պետք է լիներ համայնքի ղեկավարի կնիքը:
Նախաքննության ընթացքում Վ.Ա.-ի նկատմամբ հարուցվել է հանրային քրեական հետապնդում՝ խոշոր չափերով խարդախություն կատարելու և փաստաթղթեր, դրոշմներ, կնիքներ, ձևաթղթեր կեղծելը կամ կեղծ փաստաթղթեր, դրոշմներ, կնիքներ, ձևաթղթեր իրացնելը, պատրաստելը կամ օգտագործելու հոդվածներով։
Քրեական վարույթի նախաքննության ընթացքում հողամասերը վերադարձվել են համայնքին: