ԵՐԵՎԱՆ, 23 ապրիլի – Sputnik. Երևանի «Կասկադ» մշակութային հանգույցն ամբողջական, ֆունկցիոնալ և ավարտուն տեսքի բերելու համար ճարտարապետական նախագծի ազդեցության գոտում գտնվող որոշ տարածքների նկատմամբ հանրային գերակա շահ կճանաչվի։ Համապատասխան որոշումն ընդունվեց ՀՀ կառավարության այսօրվա նիստի ընթացքում։
ՀՀ կառավարությունը 2025թ. հոկտեմբերին համաձայնություն էր տվել «ՋԻ ԹԻ ԲԻ ԴԻՎԵԼՈՓՄԵՆԹ» ՍՊ ընկերությանն առանց մրցույթի կառուցապատման իրավունքով հողամաս տրամադրելուն և ուղղակի վաճառքի ձևով հողամաս օտարելուն ուղղված ներդրումային ծրագրին։
«Ծրագրի իրականացմամբ կձևավորվի հինն ու ժամանակակիցը համադրող բազմաֆունկցիոնալ մշակութային միջավայր, որը կբարելավի քաղաքի ճարտարապետական կերպարը և կստեղծի նոր հանրային ու մշակութային հնարավորություններ»,– ասված է որոշման մեջ։
Երևան քաղաքի գլխավոր հատակագծի համաձայն՝ «Կասկադ» համալիրի զբաղեցրած 8 հա մակերեսով տարածքի համար նախատեսվում է բարեկարգման հայեցակարգի մշակում՝ ուղղված նաև ավարտուն տեսքի հասցնելու «Կասկադ» համալիրի բարեկարգումը մինչև Ազատության պողոտա՝ «Հոկտեմբերյան հեղափոխության 50–ամյակի» հուշակոթող։
Հիշեցնենք, 2024 թվականի ապրիլին «Գաֆէսճեան» ժամանակակից արվեստի կենտրոնը Երևանին նվիրաբերեց Կասկադ համալիրի վերնամասում գտնվող 5105 քմ հողամասերը և դրանցում առկա շինությունները: