ԵՐԵՎԱՆ, 22 ապրիլի – Sputnik. 2025 թվականին Եվրամիությունում ապրող միգրանտների թիվը հասել է ռեկորդային 64 մլն–ի։ Այս մասին, ՌԻԱ Նովոստիի փոխանցմամբ, ասվում է Rockwool Foundation բերագործական հիմնադրամի զեկույցում։
«Ռեկորդային թվով այլ երկրներում ծնված մարդիկ են բնակվում ԵՄ-ում։ 2025 թվականին այդ թիվը հասել է մոտավորապես 64 մլն–ի», – ասվում է զեկույցում։
Նշվում է, որ 2010 թվականին միգրանտների թիվը կազմել է 40 մլն, այսինքն` 15 տարվա ընթացքում աճել է 60%–ով։ 2024-2025 թվականներին ԵՄ-ում միգրանտների թիվն աճել է մոտ 2.1 մլն–ով։
Հիմնադրամի տվյալներով՝ Գերմանիան շարունակում է մնալ միգրանտների ժամանման հիմնական երկիրը, նրանց թիվը 2010 թվականի մոտ 10 մլն–ից աճել է մինչև շուրջ 18 մլն՝ 2025 թվականին (մոտավորապես +70%):
Ֆրանսիան և Իսպանիան նույնպես միգրանտների կայուն աճ են գրանցել՝ 2025 թվականին հասնելով համապատասխանաբար մոտ 9.6 մլն–ի (մոտավորապես +30%՝ 2010 թվականից ի վեր) և 9.5 մլն–ի (մոտավորապես +50%):
Իտալիայում ավելի չափավոր աճ է գրանցվել՝ 2010 թվականի մոտ 4.6 մլն–ից մինչև մոտ 6.9 մլն 2025 թվականին:
ԵՄ մնացած անդամ երկրներում նույն ժամանակահատվածում ընդհանուր աճը կազմել է մոտ 11.6-ից մինչև 20.4 մլն (մոտավորապես +75%), ինչը կայուն աճի միտում է արտացոլում:
Փոքր երկրներում, ինչպիսիք են Մալթան, Կիպրոսը և Լյուքսեմբուրգը, միգրանտների ամենամեծ հոսքն է արձանագրվել՝ բնակչության թվաքանակի հաշվարկով։ Առանձնանում է Լյուքսեմբուրգը, որտեղ միգրանտները կազմում են բնակչության մոտ 52%-ը, որին հաջորդում են Մալթան (32%) և Կիպրոսը (28%): Իռլանդիան և Ավստրիան նույնպես համեմատաբար բարձր մասնաբաժիններ են ցուցադրում՝ 23%: