ԵՐԵՎԱՆ, 22 ապրիլի – Sputnik. Հայաստանի և Ռուսաստանի ռազմատեխնիկական համագործակցության առանցքային բաղադրիչ կարող են դառնալ անօդաչու զորքերը։ Այս մասին Sputnik Արմենիա մուլտիմեդիոն հարթակի մասնակցությամբ Մոսկվա-Երևան տեսակամրջի ժամանակ հայտարարեց ռուսաստանցի քաղաքագետ Արթուր Աթաևը։
Այսպես նա մեկնաբանեց ՀՀ վարչապետ Նիկոլ Փաշինյանի վերջերս արած հայտարարությունը, որ Մոսկվայում Պուտինի հետ հանդիպման ժամանակ նրանք համաձայնել են շարունակել իրականացնել ռազմատեխնիկական համագործակցության ոլորտում ձեռք բերված պայմանավորվածությունները։
Աթաևի խոսքով՝ երկու երկրներն էլ այսօր կարիք ունեն փոխլրացնելու միմյանց ձեռքբերումներն ու մշակումները։
«Զենքի համաշխարհային շուկան կտրուկ փոխվում է, դեռ վերջերս քչերը կարող էին պատկերացնել, որ ԱԹՍ–ները կարող են այդքան մեծ ազդեցություն ունենալ մարտերի ընթացքի վրա: Այսօր աշխարհում շատ քիչ երկրներ կարող են պարծենալ ԱԹՍ զորքերի գործունակ և միասնական հրամանատարությամբ: Ռուսաստանը նման երկրներից մեկն է», – ասաց Աթաևը։
Քաղաքագետը համոզված է, որ Մոսկվան առաջարկելու բան ունի գործընկերներին, այդ թվում՝ Երևանին։
Այսօր ԱԹՍ զորքի զարգացման, փոքր ու մեծ անօդաչուների զանգվածային կիրառման արդյունքում ՀՕՊ համակարգերը անպաշտպան են մնում։ Անօդաչուների և արհեստական բանականության տեխնոլոգիաների ակտիվ օգտագործումը հաճախ անօգուտ է դարձնում կենդանի ուժի առավելությունները։
Աթաևը կարծում է, որ և՛ Հայաստանը, և՛ Ռուսաստանը կարիք ունեն զարգացնելու և կատարելագործելու իրենց ԱԹՍ ուժերը։