ԵՐԵՎԱՆ, 20 ապրիլի - Sputnik. Հայաստանում սնանկության գործերով դատավարությունները թևակոխում են նոր փուլ. ապրիլի 27-ից ՀՀ արդարադատության նախարարությունը գործարկելու է սնանկության նոր` էլեկտրոնային համակարգը: Այս մասին տեղեկանում ենք արդարադատության նախարարությունից։
Նոր համակարգով փաստաթղթեր ներկայացնելը պարտադիր է լինելու կազմակերպությունների և բիզնեսի (իրավաբանական անձինք և ԱՁ-ներ), պետական և տեղական մարմինների, մասնագիտական խմբերի համար՝ փաստաբաններ, սնանկության կառավարիչներ, նոտարներ և հաշտարարներ։
Իսկ ֆիզիկական անձանց համար համակարգը պարտադիր կդառնա միայն այն դեպքում, եթե նրանք գոնե մեկ անգամ արդեն օգտվել են այդ համակարգից կամ գրանցվել են այնտեղ ու դատարանին չեն հայտնել օգտվելու անհնարինության մասին։
Արդարադատության նախարարությունից հավելել են, որ ապրիլի 27-ից հետո սկսվող նոր դատական գործերով բոլոր հիմնական փաստաթղթերը պետք է ներկայացվեն բացառապես համակարգի միջոցով։ Դրանք են` հայցադիմումները և բողոքները, դիմումներն ու միջնորդությունները, առարկություններն ու դիրքորոշումները։
Բացառություն են միայն պետական գաղտնիք պարունակող տեղեկությունները. դրանք շարունակվելու են ներկայացվել հին՝ թղթային եղանակով։
Նախարարությունից հիշեցրել են, որ Բարձրագույն դատական խորհուրդն այս տավա ապրիլի 16-ին հրապարակել է հայտարարություն սնանկության էլեկտրոնային համակարգի գործարկման վերաբերյալ։