ԵՐԵՎԱՆ, 15 ապրիլի – Sputnik. Իսրայելի պաշտպանության բանակի (ՑԱԽԱԼ) գլխավոր շտաբի պետ Էյալ Զամիրը այցելել է Լիբանանի հարավում զինվորականների գտնվելու վայր, գնահատել իրավիճակը և հայտարարել լիբանանյան և իրանական ճակատներում հետագա ծրագրերը հաստատելու մասին։
«Երեկ գլխավոր շտաբի հրամանատարության հետ միասին հաստատել եմ հետագա ծրագրերը։ Մենք շարունակում ենք մշտապես գնահատել իրավիճակը և հաստատել ծրագրերը ինչպես Լիբանանում, այնպես էլ Իրանում», – ասել է Զամիրը։
Նրա խոսքով՝ իսրայելական բանակը պահպանում է մարտական պատրաստվածության բարձր մակարդակը։
«Ինքնաթիռները զինված են և պատրաստ, թիրախները բեռնված են համակարգերի մեջ. մենք գիտենք` ինչպես օգտագործել դրանք անհապաղ և հզոր հարված հասցնելու համար», – նշել է Զամիրը։
Ավելի վաղ լիբանանյան «Al-Mayadeen» հեռուստաալիքը հայտնել էր, որ Լիբանանում մեկշաբաթյա հրադադարը կարող է ուժի մեջ մտնել ապրիլի 16–ի գիշերը։ Իսրայելական աղբյուրը Jerusalem Post-ի հետ զրույցում հերքել է այս տեղեկությունը։ Իսրայելը շարունակում է հարվածներ հասցնել Լիբանանի տարածքին այս շաբաթ ԱՄՆ–ում Իսրայելի և Լիբանանի դեսպանների միջև սկսված ուղիղ բանակցությունների ֆոնին։