Իսրայելական օդուժը հարվածներ է հասցրել Բեյրութի հարավային արվարձանին և Լիբանանի մայրաքաղաքի կենտրոնական թաղամասերին։ Տեղեկությունը հաղորդում է ՌԻԱ Նովոստին։
«Բեյրութի հարավային արվարձանում հարվածներ են հասցվել միանգամից 8 թաղամասերի։ Մեկ արկ ընկել է Հայսելյում շրջանում գտնվող սուպերմարկետի վրա, կան զոհեր և վիրավորներ»,-գործակալությանը հայտնել է լիբանանյան ռազմադաշտային աղբյուրը:
Զրուցակցի խոսքով՝ հարվածի տակ են հայտնվել նաև Բեյրութի Ջնաղի, Համա Ասկարիի, Կոլայի, Բարուբուրի, Բաստայի և Էյն աթ-Թինեի կենտրոնական շրջանները:
Ինչպես հաղորդում է RT-ն, հարվածներից մեկի տակ է հայտնվել այն թաղամասը, որտեղ գտնվում էր հեռուստաընկերության նկարահանող խումբը:
Լիբանանի Կարմիր Խաչը հայտնում է հարյուրավոր զոհերի և տուժածների մասին:
Իր հերթին իսրայելական բանակը (ՑԱԽԱԼ) հայտնել է «Մռնչացող առյուծ» գործողության սկզբից ի վեր Լիբանանի խոշորագույն ռմբակոծության մասին: Բանակի մամուլի ծառայության տվյալներով ՝ հարվածը հասցվել է Բեյրութում, Բեքաայի հովտում ու Հարավային Լիբանանում «Հըզբոլլահ»-ի ավելի քան 100 շտաբների, ռազմական օբյեկտների և կառավարման ու համակարգման կենտրոնների ուղղությամբ:
Նշենք, որ իսրայելական ավիացիան և հրետանին այսօր առավոտյան հարվածներ են հասցրել Լիբանանի հարավում գտնվող ավելի քան տասը բնակավայրերի, այդ թվում՝ տարածաշրջանի խոշորագույն քաղաք Տիրին: Իր հերթին Իրանի և ԱՄՆ-ի միջև հրադադարի հայտարարումից հետո «Հըզբոլլահ» շարժումը չի հայտնել Իսրայելի դեմ ռազմական գործողություններ իրականացնելու մասին:
Իսրայելի և «Հզբոլլահի» միջև լարվածության հերթական փուլը սկսվել է մարտի 2-ի գիշերը, երբ, տարածաշրջանում իրավիճակի ընդհանուր սրման ֆոնին, շարժումը վերսկսել է իսրայելական տարածքի հրթիռակոծումը: Ի պատասխան՝ Իսրայելը լայնածավալ հարվածներ է սկսել Լիբանանի ուղղությամբ՝ թիրախավորելով հարավային շրջանները, Բեքաայի հովիտը և Բեյրութի արվարձանները: Մարտի 16-ին իսրայելական բանակը հայտարարել էր Լիբանանի հարավում ցամաքային գործողություն սկսելու մասին։