ԵՐԵՎԱՆ, 7 ապրիլի — Sputnik. ԱՄՆ-ն Իրանին միջուկային հարված հասցնելու հարց չի դիտարկում։ Ինչպես հաղորդում են արտասահմանյան ԶԼՄ-ները, այս մասին հայտարարել են Սպիտակ տանը։
Հայտարարությունը հնչել է Թրամփի սպառնալիքների ֆոնին, որն ասել էր, թե այս գիշեր մի ամբողջ քաղաքակրթություն կկործանվի։
Ավելի վաղ ԻՀՊԿ-ն սպառնացել էր, որ Թեհրանը պատրաստ է այնպիսի հարվածներ հասցնել, որոնք ԱՄՆ-ին ու նրա դաշնակիցներին տարիներով կզրկեն նավթից ու գազից։
Հիշեցնենք` ԱՄՆ–ն ու Իսրայելը փետրվարի 28-ի առավոտյան սկսեցին հարվածներ հասցնել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Մարտի 18–ին հայտնի դարձավ, որ սպանվել են նաև Իրանի գերագույն ազգային անվտանգության խորհրդի քարտուղար Ալի Լարիջանին, նրա որդին ու հատուկ օգնականը` Մորթեզա Լարիջանին։
Իրանը մարտի 1–ից պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: