Համլետ Մանուկյանը դարձավ աշխարհի գավաթի խաղարկության հերթական փուլի հաղթող

ԵՐԵՎԱՆ, 5 ապրիլի - Sputnik. Եգիպտոսի մայրաքաղաք Կահիրեում ընթացող մարմնամարզության աշխարհի գավաթի հերթական փուլում Հայաստանի մարմնամարզության հավաքականի անդամ, Եվրոպայի չեմպիոն Համլետ Մանուկյանը ոսկե մեդալ նվաճեց: Տեղեկությունը հայտնում է Մարմնամարզության միջազգային ֆեդերացիան՞։

Եզրափակչում Մանուկյանը հավաքեց 14.800 միավոր և նվաճեց ոսկե մեդալ։

Նշենք, որ մարմնամարզության աշխարհի գավաթի խաղարկության առանձին գործիքների նժույգ-թափերի եզրափակչում Հայաստանն ուներ երկու ներկայացուցիչ` Համլետ Մանուկյանն ու Մամիկոն Խաչատրյանը, որոնք նախօրեին հաղթահարել էին որակավորման փուլի արգելքը:

Մամիկոն Խաչատրյանն էլ զբաղեցրեց 4-րդ հորիզոնականը` վաստակելով 14.533 միավոր:

Վաղը աշխարհի գավաթի խաղարկության չորրորդ փուլի հենացատկի վարժության եզրափակչում հանդես կգա Օլիմպիական խաղերի արծաթե ու բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանը: