ԵՐԵՎԱՆ, 4 ապրիլի – Sputnik. «Kuprum» ռուսական առցանց հարթակը, որը բիզնեսին օգնում է հումք գնել և վաճառել, սկսել է գործընկերներ փնտրել Երևանում։ Ծառայությունը թույլ է տալիս արտադրողներին արագ գտնել միմյանց, իսկ ընկերություններին՝ վաճառել ավելցուկը կամ գնել զեղչով։
«Ցանկացած բիզնես կարող է միլիոնավոր կամ նույնիսկ միլիարդավոր ռուբլու չօգտագործված պաշար կուտակել։ Արտադրողները կարող են դա արագ վաճառել զեղչով՝ ծախսերը վերածելով եկամտի։ Զեղչված գնով վաճառքը շահավետ է նաև փոքր բիզնեսի համար, որը դրա հաշվին կարող է նվազեցնել արտադրանքի ինքնարժեքը։ Հայկական բիզնեսը մեզ միանալու դեպքում կկարողանա ավելի հեշտ համագործակցել ինչպես ռուսական, այնպես էլ տեղական գործընկերների հետ»,– Sputnik Արմենիային ասաց ընկերության առևտրային տնօրեն Ալյոնա Բոնդարևան։
Բացի այդ, որքան շատ մասնակիցներ լինեն հարթակում, այնքան ավելի ճշգրիտ կլինի գնային պատկերը։ Հարթակին կարող են միանալ նաև փոխադրողները՝ ներկայացնելով իրենց գները, որոնք նույնպես կմոտեցվեն շուկայականին՝ մրցակցության աճին զուգընթաց։
Ռուսաստանում արդեն գործում է առցանց հարթակ բորսայական ապրանքների համար, օրինակ` հացահատիկի և շաքարավազի։ Սակայն ոչ բորսայական ապրանքների համար նման հարթակը հատկապես արդիական է, այդ թվում` պլաստիկի տարբեր տեսակների, շինանյութի, թղթի և հումքի այլ տեսակների համար, որոնք բորսաներում չեն վաճառվում։
Հարթակի արտադրանքը բաժանված է ըստ տեսակների և կատեգորիաների, ինչը զգալիորեն հեշտացնում է անհրաժեշտ հումքի որոնումը։
Հարթակը գործարկվել է այս տարվա փետրվարին։ Դեռ մշակման փուլում «Kuprum»–ի նկատմամբ հետաքրքրություն են հայտնել Կատարի ներդրողները. նրանք ծրագրում էին տեղայնացնել ծառայությունը Պարսից ծոցի երկրների համար։ Սակայն հիմնադիրները որոշել են կենտրոնանալ ռուսական շուկայի և ԱՊՀ երկրների վրա՝ իրենց հարթակը հարմարեցնելով նրանց առանձնահատկություններին։
Հեռանկարում ընկերությունը ծրագրում է լրացուցիչ ծառայություն առաջարկել բիզնեսին՝ գործարքի գործընկերոջ հուսալիության ստուգում։ Այդ նպատակով ընկերությունը մասնագիտացված ռեսուրսների միջոցով տվյալներ կհավաքագրի ձեռնարկությունների վերաբերյալ, ինչպես նաև սեփական վերլուծություն կիրականացնի։