ԵՐԵՎԱՆ, 4 ապրիլի – Sputnik. Հայաստանի Հանրապետության բանակը ՀՀ սահմաններից դուրս անելիք չունի։ Այս մասին այսօր «Քաղաքացիական պայմանագիր» կուսակցության արտահերթ համագումարի ժամանակ իր ելույթում հայտարարեց ՀՀ պաշտպանության նախարար Սուրեն Պապիկյանը։ Նա կրկին «պատերազմի կուսակցություններ» որակեց նրանց, ովքեր հակառակն են մտածում։ Նախարարը նշեց, որ իրենց իշխանությունը բազմաթիվ փոփոխություններ է կատարել բանակը պրոֆեսիոնալ դարձնելու համար։
«Վերջին տարիներին մեծ ուշադրություն է դարձվել պայմանագրային զինծառայողների վարձատրությանը և սոցիալական ապահովությանը։ Անդրադառնամ նաև զորակոչի և զորահավաքային ռեսուրսի կառավարման ուղղությամբ կատարված փոփոխություններին. 2022 թվականի համեմատ՝ 2025-ին զորակոչված զինծառայողների թիվն ավելացել է 25,3%-ով։ Սա մեր կատարած փոփոխությունների և հետևողական աշխատանքի արդյունքն է»,- ասաց նա։
Պապիկյանը կրկին մատնանշեց, որ հենց կատարված բարեփոխումների արդյունքում է պարտադիր ժամկետային ծառայությունը 2 տարուց դարձել 1,5 տարի։
Հիշեցնենք` հունվարի 1-ից պարտադիր զինվորական ծառայության ժամկետը նախկին երկու տարվա փոխարեն մեկուկես տարի է սահհմանվել։
Ծառայության ժամկետը կրճատելու առաջարկով 2025–ի սեպտեմբերին հանդես էր եկել ՀՀ պաշտպանության նախարարությունը։ Ժամկետային զինծառայողների թվի կրճատումը նախատեսվում է լրացնել պայմանագրայինների թվի ավելացման հաշվին։ Փոփոխությունը վերաբերելու է 2026 թվականի հունվարից ծառայության անցած նորակոչիկներին։