ԵՐԵՎԱՆ, 30 մարտի – Sputnik. Թուրքիայի պաշտպանության նախարարությունը հայտարարել է հերթական իրանական հրթիռը որսալու մասին, որը չորրորդն է Իրանի դեմ ԱՄՆ-ի և Իսրայելի հարվածների սկզբից ի վեր:
«Բալիստիկ զինամթերքն արձակվել է Իրանից և, մտնելով Թուրքիայի օդային տարածք, չեզոքացվել է Թուրքիայի արևելքում տեղակայված ՆԱՏՕ-ական հակաօդային և հակահրթիռային պաշտպանության միջոցներով։ Մեր երկրի ցամաքային և օդային տարածքի դեմ ուղղված ցանկացած սպառնալիքի նկատմամբ վճռականորեն ձեռնարկվում են բոլոր անհրաժեշտ միջոցները», - ասված է Թուրքիայի ՊՆ–ի հաղորդագրության մեջ:
Նշվում է, որ իրավիճակը խիստ վերահսկողության տակ է:
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Իրավիճակի սրացման ֆոնին մի շարք երկրներում վառելիքի գների աճ է նկատվում, ինչը կապված է Հորմուզի նեղուցով նավարկությունը փաստացի սահմանափակելու հետ (Հորմուզի նեղուցը Պարսից ծոցի երկրներից նավթի և հեղուկացված բնական գազի մատակարարման հիմնական երթուղին է)։ Ռուսաստանի փոխարտգործնախարար Անդրեյ Ռուդենկոն հայտնել է, որ Հորմուզի նեղուցի շուրջ ստեղծված իրավիճակի հարցը քննարկվում է ՄԱԿ-ի անվտանգության խորհրդի մակարդակով. արդեն ներկայացվել են տարբեր պետությունների համապատասխան բանաձևերի նախագծերը: