Չարաճճիությունից մինչև սպանություն ու ինքնասպանություն. մասնագետը` բուլինգի վտանգի մասին

«Մենք ունենք զսպանակի տեսություն, որի համաձայն, եթե անընդհատ ինչ-որ մեկի նկատմամբ կիրառվում է բռնություն, որը հանգեցնում է որոշակի հոգեվիճակների փոփոխության, այդ ծանրությունը մի օր պայթում է, այսինքն՝ զսպանակը սեղմեցին, սեղմեցին, և այն մի պահի դուրս պրծավ։ Այդ դեպքում մենք ունենում ենք աֆեկտային ռեակցիաներ։ Բուլինգի ենթարկված երեխան, հոգեհուզական վիճակում, ծեծի է ենթարկում բուլերին, ընդհուպ, մարմնական ծանր վնասվածքներ կարող է պատճառել»,– նշում է մասնագետը` հավելելով, որ մարզերի որոշ դպրոցներում գրանցված վերջին դեպքերը հենց ճնշման ենթարկված երեխաների կողմից ճնշողին մարմնական վնասվածք պատճառելու մասին են։

«Կա տեղեկատվություն, որը երեխային չպետք է հասանելի լինի։ Նման քայլեր նոր- նոր մեր պետությունը սկսում է իրականացնել, և հուսով եմ՝ գոնե արդյունավետ քայլեր կարվեն այդ ուղղությամբ։ Օրինակ, կան բազմաթիվ երկրներ, որտեղ «Տիկտոկը» կամ այլ նման կայքեր արգելված են երեխաների համար։ Քանի որ «Տիկտոկը» բաց տիրույթ է և ցույց է տալիս մարդկանց միջև տարբեր տեսակի շփումները, երեխաները շատ հաճախ այնտեղից վերցնում են բացասական տեղեկատվություն և սկսում են կիրառել։ Դրանք կարող են լինել տարբեր ֆլեշմոբեր, տարբեր «բաթլներ», որոնք կարող են հետաքրքրել երեխաներին։ Երեխաներ կան, ովքեր «Տիկտոկում» անգամ գումար են կարողանում վաստակել։ Այդ ընթացքում հնարավոր է նույնիսկ պահանջվի ինչ-որ մեկին բուլինգի ենթարկել, տեսանկարահանել, տարածել, իրենք կարող են անգամ գնալ այդ քայլին` չմտածելով, որ դա կարող է բավականին լուրջ հետևանքներ առաջացնել»,– նշում է մեր զրուցակիցը։