ԵՐԵՎԱՆ, 28 մարտի – Sputnik. Ամերիկյան ծովային հետևակայինները «Tripoli» նավով արդեն ժամանել են Մերձավոր Արևելք։ Այս մասին հայտարարել է ԱՄՆ զինված ուժերի կենտրոնական հրամանատարությունը։
«Միացյալ Նահանգների նավաստիներն ու ծովային հետևակայինները ժամանել են «USS Tripoli» դեսանտային նավով»,- ասված է X սոցիալական ցանցում հրապարակված հայտարարության մեջ։
Հարվածային խումբը ներառում է շուրջ 3 500 զինծառայող, ինչպես նաև ավիացիոն թև՝ բաղկացած տրանսպորտային և մարտական ինքնաթիռներից, ինչը զգալիորեն մեծացնում է դեսանտային և հարձակողական գործողություններ իրականացնելու ամերիկյան հնարավորությունները։
Հաղորդվում է նաև, որ անձնակազմից բացի, տարածաշրջան է բերվել նաև ռազմական տեխնիկա, այդ թվում՝ տրանսպորտային ինքնաթիռներ և ռազմական կործանիչներ։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Մարտի 17-ին սպանվեց Իրանի անվտանգության խորհրդի քարտուղար Ալի Լարիջանին։
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: