ԵՐԵՎԱՆ, 27 մարտի – Sputnik. Գործարար, բարերար, «Ուժեղ Հայաստան» կուսակցության առաջնորդ Սամվել Կարապետյանը խոստանում է, որ իր՝ վարչապետ լինելու դեպքում խաղաղ կլինի ոչ միայն գալիք սեպտեմբերը, այլև ամեն ամիս։ Այս մասին նշված է ֆեյսբուքյան պաշտոնական էջում տարածված ուղերձում։
Ավելի վաղ ՀՀ վարչապետ Նիկոլ Փաշինյանը հայտարարել էր՝ եթե ՔՊ-ն ընտրությունների արդյունքում մեծամասնություն չկազմի, ապա սեպտեմբերին պատերազմ կլինի։
Սամվել Կարապետյանի խոսքով՝ խաղաղություն խոստացող իշխանությունը 3 պատերազմ է բերել, որոնցում պարտվել ենք, ուստի ինչու՞ պետք է նրան կրկին վստահել։
Կարծում է՝ Հայաստանի խաղաղությունն այսօր ժամանակավոր է՝ առանց մի քանի երաշխավորների, թույլ սահմաններով և թույլ պաշտպանությամբ։
Խոստանում է վարչապետ դառնալու դեպքում ապահովել երկարատև խաղաղություն, որը հիմնված կլինի դիվանագիտության, անվտանգության մի քանի երաշխավորների, ուժեղ պաշտպանության վրա` 10,000 անօդաչու թռչող սարքերով, արդիականացված, պրոֆեսիոնալ վերազինված բանակով։ Վստահ է նաև, որ այսօր աշխարհում ուժեղ տնտեսությունն ուժեղացնում է դիվանագիտությունը և պաշտպանությունը, ուստի խոստանում է ուժեղ տնտեսություն ստեղծել։
«Երկրի հեռացող ղեկավարությունը փորձում է ձեզ համոզել, թե դա անհնար է, և որ խաղաղության միակ ճանապարհը թուլությունն է և մեր հակառակորդների պահանջներին ենթարկվելը։ Նրանք փորձում են մեզ հավաստիացնել, որ, եթե հրաժարվենք մեր հայկական խորհրդանիշներից, մեր օրինական շահերից, ապա կունենանք խաղաղություն։ Սա մեծ սուտ է․․․ Թույլ մի՛ տվեք, որ նույն մարդիկ, ովքեր արդեն ապացուցել են, որ ի վիճակի չեն պաշտպանել Հայաստանը, ձեզ կրկին սպառնան պատերազմով»,- գրել է Կարապետյանը։
Հավելենք, որ ՔԿ-ն մարտի 19-ին բավարարել էր պաշտպանական կողմի միջնորդությունը և թույլատրել Կարապետյանին տեսաուղերձով հանդես գալ։