ԵՐԵՎԱՆ, 25 մարտի – Sputnik. Նիկոլ Փաշինյանի նախընտրական քարոզարշավի ռազմավարությունը տարբերվում է նրանից, ինչ 2021թ․-ին էր։ Այսօր Կոմիտասի անվան պանթեոնում լրագրողների հետ ճեպազրույցում ՀՀԿ փոխնախագահ Արմեն Աշոտյանը շեշտեց՝ եթե 2021թ․ Փաշինյանն ընտրությունների էր գնում մարդկանց խաբելով, ապա այսօր ազնիվ է։
Նշենք, որ ՀՀԿ գործիչներն այսօր Կոմիտասի անվան պանթեոն են այցելել՝ հարգելու ՀՀ նախկին վարչապետ (2000-2007 թթ.), ՀՀԿ նախկին նախագահ Անդրանիկ Մարգարյանի հիշատակը։
«2021թ․ նրա նախընտրական ծրագիրը խաբեություն էր ոչ միայն տնտեսական, սոցիալական և այլ բլոկերով, Արցախի մասին խաբեություն էր։ Վերարտադրվելուց հետո երբ կառավարությունը նույն դրույթները վերցրեց իր ծրագրի մեջ, ընդդիմությունն ասում էր՝ «դու լեգիտիմ չես, որովհետև քո քայլերը հակասում են քո կառավարության ծրագրին»։ Նիկոլն այս անգամ ազնիվ է, բացառիկ տեղ է, որ ազնիվ է՝ իր անհայրենիքությունն է։ Եթե 2026թ․ նա վերալեգալացվեց որպես վարչապետ, ապա ոչ ոք չի կարող ասել, որ դու խաբել ես ժողովրդին»,- նշեց Աշոտյանը։
Ինչ վերաբերում է խաղաղության վերաբերյալ խոստումներին, Աշոտյանի կարծիքով՝ դրանք սին են։
Աշոտյանը նաև նկատում է՝ որքան էլ Փաշինյանը փորձում է երկրում վախի մթնոլորտ սերմանել, կան մարդիկ, ովքեր չեն վախենում խոսել ու իրենց կարծիքն ասել։ Դրա մասին է վկայում օրեր առաջ մետրոյում տեղի ունեցած միջադեպը։