ԵՐԵՎԱՆ, 21 մարտի – Sputnik. Ճապոնիայի խաղաղության կոմիտեն հանդես է եկել Ճապոնիայի և ԱՄՆ-ի գագաթնաժողովի խիստ քննադատությամբ՝ վարչապետ Սանաե Տակաիտիին մեղադրելով Վաշինգտոնի քաղաքականությանն անվերապահ աջակցելու մեջ:
Կազմակերպության հայտարարության մեջ նշվում է, որ հանդիպման ժամանակ Տակաիտին գնահատական չի տվել Իրանին ԱՄՆ-ի հարվածներին, որոնք, կոմիտեի կարծիքով, խախտում են ՄԱԿ-ի կանոնադրությունը: Փոխարենը նա հայտարարել է, որ «միայն Դոնալդ Թրամփն է ի վիճակի ապահովել խաղաղություն և բարգավաճում», ինչպես նաև պատրաստակամություն է հայտնել աջակցել Միացյալ Նահանգներին:
Ճապոնիայի վարչապետ Սանաե Տակաիտին և ԱՄՆ նախագահ Դոնալդ Թրամփը
© Photo : official site of The White House
Հայտարարության հեղինակները կարծում են, որ նման դիրքորոշումը վկայում է ամերիկյան վարչակազմի կուրսի նկատմամբ ամբողջական կողմնորոշման մասին և «խայտառակում է Ճապոնիան համաշխարհային հանրության առջև»:
Կոմիտեում նաև հիշեցրել են, որ գագաթնաժողովի նախօրեին երկրի իշխանություններին կոչ են արել հանդես գալ Իրանին հարվածները դադարեցնելու օգտին և հրաժարվել ռազմական գործողություններին հնարավոր մասնակցությունից, այդ թվում՝ Հորմուզի նեղուց նավեր ուղարկելուց:
«Մենք պահանջում ենք հրաժարվել անօրինական պատերազմում ցանկացած համագործակցությունից և գործել Սահմանադրությանը և միջազգային իրավունքին համապատասխան»,- ասվում է հայտարարության մեջ:
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Իսրայելի պաշտպանության նախարարը մարտի 17-ին հայտնեց Իրանի անվտանգության խորհրդի քարտուղար Ալի Լարիջանիի սպանության մասին։ Ավելի ուշ Թեհրանը հաստատեց այդ լուրը։