ԱՄՆ-ն գործի է դրել հարվածային ավիացիան Հորմուզի նեղուցը ապաարգելափակելու համար. ԶԼՄ

ԵՐԵՎԱՆ, 20 մարտի – Sputnik. ԱՄՆ-ն և նրա դաշնակիցները գործի են դրել հարվածային ավիացիան, այդ թվում՝ A-10 գրոհային ինքնաթիռները և Apache ուղղաթիռները Հորմուզի նեղուցով նավագնացության վերականգնման գործողության շրջանակներում Իրանի ռազմածովային ուժերին և անօդաչուներին հարվածելու համար, հայտնում է Wall Street Journal-ը՝ հղում անելով ԱՄՆ զինվորականներին։

ԱՄՆ շտաբների պետերի միացյալ կոմիտեի նախագահ, գեներալ Դեն Քեյնի խոսքով՝ «A-10-երը արդեն գործում են հարավային ուղղությամբ և հարվածում Հորմուզի նեղուցում գտնվող արագընթաց մոտորանավակներին», Apache-ներն էլ «միացել են գործողությանը»։

Նշվում է, որ այս արշավը` իրանական մոտորանավակներից, ականներից և թևավոր հրթիռներից «սպառնալիքները նվազեցնելու» վերաբերյալ Պենտագոնի բազմափուլ ծրագրի մի մասն է։

Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:

Իսրայելի պաշտպանության նախարարը մարտի 17-ին հայտնեց Իրանի անվտանգության խորհրդի քարտուղար Ալի Լարիջանիի սպանության մասին։ Ավելի ուշ Թեհրանը հաստատեց այդ լուրը։