ԵՐԵՎԱՆ, 18 մարտի – Sputnik. Ռուսաստանը վճռականորեն դատապարտում է ինքնիշխան Իրանի ղեկավարության ներկայացուցիչների առողջությանը վնաս հասցնելուն ուղղված գործողությունները, առավել ևս` նրանց սպանությունը։ Այս հայտարարությունն արել է ՌԴ նախագահի մամուլի քարտուղար Դմիտրի Պեսկովը։
Նա մեկնաբանել է հարցը, թե արդյոք Իրանի քաղաքական ղեկավարության սպանությունը ռազմական հանցագործություն է, և արդյոք Ռուսաստանը հենց այդպես է մեկնաբանում Իրանի ազգային անվտանգության գերագույն խորհրդի քարտուղար Ալի Լարիջանիի և Իրանի ղեկավարության այլ ներկայացուցիչների մահը։
«Առողջությանը վնաս հասցնելուն ուղղված գործողությունները կամ առավել ևս ինքնիշխան և անկախ Իրանի ղեկավարության, ինչպես նաև այլ երկրների ներկայացուցիչների սպանությունն ու ոչնչացումը... Մենք դատապարտում ենք նման գործողությունները», – ասել է Պեսկովը։
Ավելի վաղ իսրայելական կողմը հայտնել էր, որ Թեհրանում Իսրայելի հարձակման հետևանքով սպանվել են Իրանի ազգային անվտանգության գերագույն խորհրդի քարտուղար Ալի Լարիջանին և «Բասիջ» կամավորական ուժերի հրամանատար Ղոլամրեզա Սոլեյմանին։ Իրանի իշխանությունները պաշտոնապես հաստատեցին նրանց մահը։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: