ԵՐԵՎԱՆ, 18 մարտի – Sputnik. Ազգային անվտանգության բարձրագույն խորհրդի քարտուղար Ալի Լարիջանիի մահը չի ազդի Իրանի իշխանության կայունության վրա, հայտարարել է արտգործնախարար Աբբաս Արաղչին։
Նրա խոսքով՝ ամերիկացիներն ու իսրայելցիները մինչև հիմա չեն գիտակցել, որ Իսլամական Հանրապետությունը հզոր քաղաքական կառուցվածք ունի։ Մեկ անձի ներկայությունը կամ բացակայությունը չի ազդում այդ կառուցվածքի վրա, Al Jazeera-ին տված հարցազրույցում ասել է արտգործնախարարը։
Նախարարը հավելել է, որ գլխավոր գործոնը համակարգի ամրությունն է, այլ ոչ թե անհատները։
Երեկ Իսրայելի պաշտպանության նախարար Իսրայել Կացը հայտարարել էր, որ Լարիջանին սպանվել է Թեհրանի վրա Իսրայելի հարձակման ժամանակ։ Ավելի ուշ Լարիջանիի գրասենյակը հաստատել է նրա մահը։ Ազգային անվտանգության բարձրագույն խորհրդի քարտուղարը իշխանության ամենաազդեցիկ դեմքերից մեկն էր։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: