«Օսկար» մրցանակաբաշխության պատմությունը սկսվել է 1929 թվականի մայիսի 16-ին: Այն ժամանակ փոքրիկ փակ բանկետի ժամանակ առաջին անգամ հանձնվեց «Լավագույն ֆիլմ» անվանակարգի արձանիկը, այն ստացավ «Թևեր» (1927) համր կինոնկարը:
Նույն տարում հայտնի դարձան նաև դերասանական անվանակարգերի առաջին դափնեկիրները՝ Էմիլ Յանինգսը և Ջանեթ Գեյնորը: Ժամանակի ընթացքում մրցանակաբաշխությունը հարստացավ բազմաթիվ ռեկորդներով: Այսպես, միանգամից երեք ֆիլմ՝ «Ամեն ինչ Եվայի մասին» (1950), «Տիտանիկ» (1997) և «Լա-Լա Լենդ» (2016) ֆիլմերը 14-ական անվանակարգում Օսկար են ստացել, ինչը առավելագույն ցուցանիշըն է մրցանակաբաշխության պատմության մեջ: Իսկ հաղթանակների քանակով ռեկորդը՝ 11-ական արձանիկ, կիսում են «Բեն-Հուր» (1959), «Տիտանիկ» և «Մատանիների տիրակալը. Թագավորի վերադարձը» (2003) ֆիլմերը:
Դերասաններից կնոջ լավագույն դերակատարման համար ամենաշատ մրցանակներ ստացել է Քեթրին Հեփբըրնը՝ 4 «Օսկար»: Տղամարդկանց ռեկորդը պատկանում է Դենիել Դեյ-Լյուիսին, որը երեք անգամ դափնեկիր է «Տղամարդու լավագույն դերակատարում» անվանակարգում:
Իր հիմնադրման պահից ի վեր մրցանակաբաշխությունն անցել է համեստ արարողությունից մինչև կինոաշխարհի ամենամասշտաբային իրադարձություններից մեկը դառնալու ճանապարհը։ Մրցանակաբաշխության հերթական՝ 98-րդ արարողությունը կրկին միավորել էր կինոոլորտի աստղերին, այն հանդիսատեսին պարգևեց վառ պահեր, որոնք արդեն իսկ դարձել են կինեմատոգրաֆի պատմության մաս: