ԵՐԵՎԱՆ, 16 մարտի - Sputnik. Իրանի վրա ուխտադրուժ և չհրահրված հարձակմամբ ԱՄՆ-ն ու Իսրայելը բռնության նոր փուլ են սանձազերծել Մերձավոր Արևելքում։ Այս մասին հայտարարել է ՌԴ ԱԳՆ-ն՝ տարածաշրջանում ճգնաժամի ընդլայնման կապակցությամբ։
«Իրանի վրա իրենց ուխտադրուժ և չհրահրված հարձակմամբ ԱՄՆ-ն և Իսրայելը Մերձավոր Արևելքում բռնության աննախադեպ շրջապտույտ են սկսել, որի վերջը չի երևում»,-ասված է ՌԴ ԱԳՆ պաշտոնական կայքում հրապարակված հաղորդագրության մեջ։
ՌԴ արտաքին քաղաքական գերատեսչությունում արձանագրել են, որ ամերիկա-իսրայելական ագրեսիայի զոհերի թիվը հասնում է հարյուրների և հազարների, անդառնալի վնաս են կրում քաղաքացիական ենթակառուցվածքները, Իրանի պատասխան հարվածներից տուժում են նաև հարևան երկրները, կաթվածահար է եղել նավագնացությունը համաշխարհային տնտեսության համար կարևորագույն նշանակություն ունեցող Հորմուզի նեղուցով:
Դրա հետ մեկտեղ նախարարությունում նկատել են, որ ապաէսկալացիայի ուղիներ փնտրելու և բանակցություններին վերադառնալու փոխարեն նկատվում է հետագա փոխադարձ դաժանացում, կողմերը ավելի ու ավելի մահացու և կործանարար հարվածներ են հասցնում միմյանց։
«Վերահաստատում ենք բոլոր կողմերին ուղղված մեր հաստատակամ կոչը՝ անհապաղ դադարեցնել մարտական գործողությունները և իրավիճակը տեղափոխել քաղաքական-դիվանագիտական հուն: Եվ առաջին հերթին՝ հրաժարվել քաղաքացիական օբյեկտների ու ենթակառուցվածքների վրա հարձակումներից, կանգնեցնել խաղաղ բնակչության մահերն ու տառապանքները ինչպես Պարսից ծոցի արաբական երկրներում, այնպես էլ Իրանում»,-նշված է ՌԴ ԱԳՆ հայտարարության մեջ։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Իրանի շուրջ էսկալացիան հանգեցրել է Հորմուզի նեղուցի՝ Պարսից ծոցի երկրներից նավթի ու հեղուկացված բնական գազի համաշխարհային շուկա մատակարարումների առանցքային երթուղու փաստացի արգելափակմանը։