ԵՐԵՎԱՆ, 13 մարտի – Sputnik. Թեհրանը կարևոր է համարում ԱՄՆ-ի և Իսրայելի ռազմական ագրեսիայի դատապարտումը միջազգային և տարածաշրջանային կազմակերպությունների կողմից։ Հնդկաստանի արտգործնախարար Սուբրամանյամ Ջայշանկարի հետ հեռախոսազրույցի ընթացքում այս մասին հայտարարել է Իրանի արտաքին գործերի նախարար Աբբաս Արաղչին։
Իրանցի նախարարը հնդիկ գործընկերոջը տեղեկացրել է երկրի դեմ ԱՄՆ-ի և Իսրայելի հարվածների ու գործողությունների հետևանքով ստեղծված իրավիճակի, ինչպես նաև տարածաշրջանային և համաշխարհային անվտանգության ու կայունության վրա դրանց ազդեցության մասին։
Բացի այդ, նախարարը մատնանշել է ԲՐԻԿՍ միավորման կարևոր դերը՝ որպես բազմակողմ համագործակցության զարգացման հարթակ, և ընդգծել է տարածաշրջանում և աշխարհում կայունության ու անվտանգության ապահովման գործում դրա կառուցողական մասնակցության անհրաժեշտությունը։
Ջայշանկարն իր հերթին հայտարարել է, որ Հնդկաստանը պատրաստ է զարգացնել երկկողմ և բազմակողմ համագործակցությունը տարածաշրջանային ու միջազգային հարթակների շրջանակում։ Նա նաև շեշտել է տարածաշրջանում երկարաժամկետ կայունության և անվտանգության ամրապնդման ուղիների որոնման կարևորությունը։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Ռուսաստանը հայտարարել է, որ Վաշինգտոնի և Թել Ավիվի գործողությունները ոչ մի կապ չունեն միջուկային զենքի չտարածման ռեժիմի պահպանման հետ, և պահանջել է վերադառնալ բանակցություններին: ՌԴ արտգործնախարար Սերգեյ Լավրովն ընդգծել է, որ Մոսկվան պատրաստ է աջակցել կարգավորմանը, այդ թվում՝ ՄԱԿ-ի անվտանգության խորհրդում: