ԵՐԵՎԱՆ, 10 մարտի – Sputnik․ Վրաստանի և Հայաստանի քաղաքացիները, որոնք մնացել են Թաիլանդում, կկարողանան մարտի 11-ին` ժամը 19:30-ին, Բանգկոկից Թբիլիսի մեկնել չարտերային չվերթով։ Այս մասին հայտնում է Sputnik Գրուզիան։
«Վրաստանի կառավարությունն օգնեց մեզ ստանալ չարտերային չվերթի թույլտվություն: Հայաստանի դեսպանատունն օգնում է մեզ՝ տարածելով այս տեղեկությունը: Մեզ շատ հայեր են միացել», – BMG մեդիահարթակին հայտնել է չվերթի կազմակերպիչ, «Wonderfly» տուրիստական ընկերության հիմնադիր Թամունա Բոջգուան:
Ըստ նրա` արդեն հավաքվել է 100 մարդ, ևս 50 ազատ տեղ կա:
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Վնասվել է Դուբայի օդանավակայանը, որն օրական շուրջ 1000 չվերթ է սպասարկում, ինչպես նաև Աբու Դաբիի օդանավակայանը։ Չեղարկվել են հազարավոր չվերթեր, այդ թվում` Շարժայից, Դոհայից և այլ Մերձավոր Արևելքի տարբեր քաղաքներից դեպի Հայաստան և հակառակ ուղղությամբ։
Հայաստանից Մերձավոր Արևելք չվերթեր իրականացնող մի քանի ավիաընկերություններ չեղարկել են մարտին նախատեսված թռիչքները։
Ստեղծված իրավիճակի և տարանցիկ չվերթերի չեղարկման հետևանքով բազմաթիվ քաղաքացիներ չեն կարողանում Հայաստան վերադառնալ նաև ասիական մի շարք երկրներից, այդ թվում՝ Թաիլանդից, Վիետնամից, Մալդիվներից և այլն։