ԵՐԵՎԱՆ, 10 մարտի – Sputnik. Իրանում ավելի քան 200 կին և երեխա է զոհվել ԱՄՆ-ի և Իսրայելի հետ հակամարտության ընթացքում: Այս մասին հայտարարել է Իրանի կառավարության պաշտոնական ներկայացուցիչ Ֆաթեմե Մոհաջերանին։
«Հարձակումների ընթացքում 206 կին և երեխա է զոհվել», - ասել է Մոհաջերանին, որի խոսքը մեջբերում է «Mehr» գործակալությունը:
Նա հակամարտության զոհերի վերաբերյալ ընդհանուր տվյալներ չի հայտնել, սակայն ՄԱԿ-ում Իրանի մշտական ներկայացուցիչ Ամիր Սաիդ Իրավանին հայտարարել է ավելի քան 1,3 հազար զոհվածների մասին:
Մոհաջերանիի խոսքով՝ հարվածների տակ են հայտնվել շուրջ 100 առողջապահական օբյեկտներ, ինչպես նաև 16 մեքենա ու շտապօգնության ուղղաթիռ, զոհվել է 11 բուժաշխատող:
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Ռուսաստանը հայտարարել է, որ Վաշինգտոնի և Թել Ավիվի գործողությունները ոչ մի կապ չունեն միջուկային զենքի չտարածման ռեժիմի պահպանման հետ, և պահանջել է վերադառնալ բանակցություններին: ՌԴ արտգործնախարար Սերգեյ Լավրովն ընդգծել է, որ Մոսկվան պատրաստ է աջակցել կարգավորմանը, այդ թվում ՝ ՄԱԿ-ի անվտանգության խորհրդում: