ԵՐԵՎԱՆ, 10 մարտի – Sputnik. Իրանի բանակը ԱՄՆ-ի և Իսրայելի թիրախներին հասցվող հարվածները «նոր մակարդակի» է հասցնում։ Այս մասին հայտարարել է Իսլամական հեղափոխության պահապանների կորպուսը (ԻՀՊԿ):
Իրանական «Tasnim» գործակալության Telegram ալիքում հրապարակված հայտարարության մեջ ասվում է, որ ԻՀՊԿ-ն ԱՄՆ-ի և Իսրայելի թիրախներին հարվածում է «Քադր», «Էմադ», «Ֆաթթահ» և «Հեյբար» հրթիռներով։
«Հզոր ռազմավարական հրթիռների նպատակաուղղված արձակումները ամերիկացի և սիոնիստ ագրեսորների հետ մարտի դաշտը նոր մակարդակի են դուրս բերել», – նշվում է հայտարարության մեջ։
Ավելի վաղ Իսրայելի պաշտպանության բանակը (ՑԱԽԱԼ) հայտարարել էր,որ իսրայելական ուժերը հարվածել են ԻՀՊԿ հետազոտական համալիրին։
Հիշեցնենք` ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: