ԵՐԵՎԱՆ, 9 մարտի – Sputnik. Իրանը միջազգային ատյաններ է դիմել ԱՄՆ-ի կողմից իրանական «Դենա» ռազմանավը խորտակելու հարցով: Այս մասին հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային։
«Մենք միջազգային կազմակերպություններում բարձրացրել ենք այդ հարցը որպես պատերազմի ընթացքում միջազգային իրավունքի և մարդասիրական նորմերի հազարավոր խախտումներից մեկը», - ճեպազրույցի ընթացքում ասել է Բաղային:
Նա նաև հայտարարել է, որ Թեհրանը երբեք չի մոռանա այդ հանցագործությունը, որը մի շարք հիմնարար մարդասիրական փաստաթղթերի, այդ թվում՝ պատերազմի զոհերի պաշտպանության մասին 1949 թվականի Ժնևյան կոնվենցիայի խախտում է: Նրա խոսքով՝ նավը գտնվել է Պարսից և Օմանի ծոցերից հեռու, որտեղ այդ պահին մարտական գործողություններ են ընթացել։
Հիշեցնենք, որ մարտի 4-ին Հնդկական օվկիանոսում իրանական ռազմանավ էր հարձակման ենթարկել։ Իրանի ԱԳՆ-ն հայտնել էր, որ դա արարողակարգային նավ է եղել, որում զենք չի եղել: Միջազգային ջրերում խորտակված նավում շուրջ 130 նավաստի էր եղել, որոնցից մոտ 100-ը մահացել էին: Շրի Լանկայի ռազմածովային ուժերի նավերը փրկել էին 32 իրանցի նավաստիների։
ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Ռուսաստանը հայտարարել է, որ Վաշինգտոնի և Թել Ավիվի գործողությունները ոչ մի կապ չունեն միջուկային զենքի չտարածման ռեժիմի պահպանման հետ, և պահանջել է վերադառնալ բանակցություններին: ՌԴ արտգործնախարար Սերգեյ Լավրովն ընդգծել է, որ Մոսկվան պատրաստ է աջակցել կարգավորմանը, այդ թվում ՝ ՄԱԿ-ի անվտանգության խորհրդում: