ԵՐԵՎԱՆ, 9 մարտի – Sputnik. Հունգարիայի կառավարությունը Եվրամիության ղեկավարությանն առաջարկում է անհապաղ թույլ տալ ռուսական էներգակիրների մատակարարումը, որպեսզի խուսափեն միության երկրներում գների կտրուկ աճից։ Ինչպես տեղեկացնում է ՌԻԱ Նովոստին, այս մասին հայտարարել է Հունգարիայի արտգործնախարար Պետեր Սիյարտոն։
«Եթե Բրյուսելը չվերացնի ռուսական նավթի և գազի ներմուծման արգելքը, եթե չվերացնի պատժամիջոցները, դա չափազանց խոր հարված կհասցնի եվրոպական տնտեսությանը։ Էներգակիրների արժեքի աճի հետ մեկտեղ աճում են նաև մնացած ամեն ինչի գները», – ասել է նա վարչապետ Վիկտոր Օրբանի կողմից հրավիրված` պաշտպանության և էներգետիկ անվտանգության խորհուրդների արտակարգ նիստերից հետո Facebook-ում* իր տեսաուղերձի ժամանակ։
Սիյարտոն նշել է`թանկացումը կարող է այնպիսի մասշտաբների հասնել, որ Եվրամիության անդամ երկրների բնակիչները բախվեն աննախադեպ խնդիրների։
Նա հավելել է`Մերձավոր Արևելքում ընթացող հակամարտության սրացման պատճառով փակվել է Հորմուզի նեղուցը, որով իրականացվում է նավթի ծովային փոխադրումների 33%-ը և հեղուկ բնական գազի 20%-ը:
«Այս նեղուցով անցնում էր Սաուդյան Արաբիայի արտահանման մոտ 90%-ը։ Այսպիսով Մերձավոր Արևելքում ընթացող պատերազմի պատճառով նավթի զգալի մասը դուրս է բերվում համաշխարհային շուկայից», – ասել է նախարարը։
Նախորդ տարվա հոկտեմբերի կեսերին Եվրամիության խորհուրդը հաստատեց 2026 թվականի հունվարի 1-ից ռուսական գազի մատակարարումներից փուլ առ փուլ հրաժարվելու նախագիծը: Գործող պայմանագրերի համար անցումային շրջանը կպահպանվի մինչև 2028 թվականի հունվարի 1-ը: Մինչև հունիսի 17-ը կնքված կարճաժամկետ համաձայնագրերի համար ռուսական հեղուկ բնական գազի ներմուծման արգելքը կսկսի գործել 2026 թվականի ապրիլի 25-ից:
*Meta-ի (Facebook և Instagram սոցցանցեր) գործունեությունն արգելված է Ռուսաստանում։